Relaciona cu e reciente informacionnan den media na publico encuanto Harbour House Project cu ta den construccion riba Schoenerhaven, Aruba Ports Authority N.V. (APA) y Poundwise Investments and Developments VBA (Poundwise) kier informa y clarifica lo siguiente:
Na mei, 2017, Poundwise a cumpra ex edificio di Marazul den un destaho publico (findishi) pa desaroya un edificio residencial y comercial bou di e nomber Harbour House. E limite di e parcela (tereno), incluyendo e zona di parkeerplaats, no a cambia desde e findishi.
APA tin bou di su maneho e area di awa y un parti di e area di tereno cu ta rondona e edificio di Harbour House.
Na 2017 Poundwise a presenta e Proyecto di embeyecemento di e area na APA y e respectivo autoridad nan gubernamental pa aprobacion.
For di e temporada ey na2017, a mantene un dialogo habri riba iniciativa di APA entre e partidonan directamente relaciona cu e area.
Stichting Rancho y APA a aproba un “boardwalk”y e drechamento/embeyecemento di e caminda na den coordinacion cu DOW. Nunca tabata ni ta e intencion di APA pa transferi e derechonan di maneho di e area di awa of di e terenonan na un tercer partido, pa cual nan lo keda bou maneho di APA.
Tur caretera y piernan rond di Harbour House cu actualmente tin acceso publico, lo keda asina. E acceso na e waf (pier) ta garantisa na tur momento pa e piscadonan, incluyendo e piscadonan di Stichting Rancho. A informa tur partido interesa debidamente di esaki hopi biaha den pasado y un biaha mas recientemente.
E proyecto total di embeyecimento inclui un facilidad pa e piscadonan cu ta inclui baño y conexion di awa, esaki na e discrecion di e piscadonan. Pa e parti aki Poundwise a pone disponibel 50 mil dollar.
E embeyecemento di Schoenerhaven na final ta beneficia Aruba en general:
- Ta elimina un mahos bista di 17 aña na porta di entrada di Aruba
- Mantene e pier na e localidad actual cu un facilidad nobo, semper conservando e actividad di piscamento cual ta parti di e tradicion y cultura local
- Lo prove 100 cupo di trabou directo na tiendanan di Harbourwalk y na Harbour House Residences, cual ta un empuhe pa economia local durante e tempo sin precedente cu ta pasando aden.
- Lo general entrada adicional di impuesto pa gobierno di Aruba (GoA)
- Harbour House lo ta un luga nobo di entretenimento y disfruta pa local y bishitantenan mientras cu ta conserva e cultura di Aruba.
- Harbour House ta cuadra cu e plannan di GoA pa yuda reactiva e area di centro (downtown).
- E lo tin un impacto positivo riba industria crucero ya cu e ta haci e area mas atractivo pa turistanan crucero.
