Durante e prome ronda di e reunion publico tocante e situacion na Korrectie Instituut Aruba (KIA), Parlamentario Xiomara Maduro a enfoca su discurso riba e costo financiero di e crisis y e responsabilidad di Gobierno den e maneho di seguridad.
Segun Maduro, e debate no tabata solamente tocante un prizon, sino tocante e forma con Gobierno ta proteha tanto siguridad como e placa di pueblo. “Siguridad no ta gratis, pero insiguridad ta costa hopi mas,” Maduro a declara.
Parlamentario Maduro a señala cu, segun un comunicado oficial di Dienst Gevangeniswezen Aruba (DGWA), e controlpoortnan y bagagescans na KIA a wordo kita sin cu tabatin un sistema operacional pa reemplasa nan. Segun Maduro, esaki no solamente ta crea riesgo pa siguridad, sino tambe por resulta den gastonan adicional pa pueblo. P’esey el a pidi cu Gobierno duna claridad riba varios punto importante, manera ken a tuma e decision pa kita e ekiponan, si a haci un evaluacion di riesgo, si tabata tin un plan di contingencia y si tabata tin un presupuesto pa reemplasa e sistema di seguridad.
Un otro punto di preocupacion tabata e posibilidad cu e situacion actual por wordo declara un emergencia pa haci compranan urgente. Maduro a bisa cu un emergencia nunca mester bira un motibo pa laga e reglanan di transparencia un banda. Maduro a puntra tambe si tin intencion pa cera “noodcontract” of haci un “spoedaankoop” y, si asina, cuanto esaki lo costa y con lo garantisa cu pueblo ta haya e miho prijs.
Den e parti final di su discurso, Maduro a bolbe riba e trabounan cu a wordo haci pa United Nations Office for Project Services (UNOPS). El a recorda cu Fase 0 di e proyecto pa un prizon nobo ya a wordo completa cu financiamiento di Hulanda y cu e informe ta inclui un roadmap, un plan di implementacion y un calculacion di inversion di aproximadamente 119 miyon dollar. Segun e informe, un prison moderno tambe por reduci costonan operacional cu alrededor di 18% pa aña.
Maduro a expresa preocupacion cu, apesar di reunionnan cu Minister a tene na Hulanda cu Ministerio di Asuntonan di Reino (BZK) y cu UNOPS, Parlamento ainda no a ricibi e documentonan cu a wordo priminti. Segun Maduro, pueblo tin derecho di sa kico a cambia concretamente despues di e reunionnan ey y cuanto e tardansa den tuma decision ta costa Pueblo di Aruba cada luna.
Parlamentario Maduro a conclui cu pueblo di Aruba ta pagando dos biaha: pa un crisis cu, segun e, por a wordo evita, y pa un solucion cu no ta avansa. Maduro a enfatisa cu falta di decision semper ta hiba na gastonan extra cu finalmente ta wordo paga pa Pueblo di Aruba.
“Pueblo no ta pidi milagro. Pueblo ta pidi responsabilidad, planificacion y transparencia. Finalmente, e cuenta semper ta yega serca e pueblo,” Maduro a conclui, insistiendo cu Gobierno mester duna contesta cla riba ken lo asumi responsabilidad pa e costo di e crisis actual y pa e tardansa den e plan di accion di UNOPS.