Dia 9 februari 1971, sr. Betico Croes, dfm, a funda Partido MEP, y a cuminsa cu e lucha pa Aruba haya su Status Aparte. Betico tawata forma parti di partido AVP, y a wordo eligi como lider di e partido pa e lidernan di bario. Sinembargo e doñonan di e partido AVP no tabata di acuerdo pa Betico bira lider, y a hiba Betico corte. Hues a haya suficientemente prueba cu AVP ta un partido di famia Eman, y cu no ta importa kico lidernan di bario scoge, ta e famia ta dicidi. Y nan a dicidi cu Betico no por bira lider.
Apesar cu esaki tabata un desapunto p’e, su determinacion pa lucha pa nos Status Aparte tawata mucho mas grandi, y el a dicidi hunto cu e lidernan di bario, di funda su partido MEP. Esaki a pasa dia 9 febr 1971. Y otro aña, Partido MEP ta celebrando 50 aña di existencia.
Partido MEP a conoce 3 lider den e 50 añanan aki: Sr. Betico Croes, pa e prome 15 aña, Sr. Nel Oduber pa e siguiente 25 aña, Sra, Evelyn Wever-Croes pa casi 10 aña.
“Pami ta un gran honor di por lidera e partido prestigioso aki”, Lider di MEP a expresa.
Historia ta mustra nos cu e partido aki a logra cosnan grandi pa Aruba, entre otro Inauguracion di nos himno y nos bandera. Aprobacion di ortografia di nos idioma Papiamento, Status Aparte. Nos propio moneda, nos propio Banco Central, nos proprio Parlamento
Despues cu Betico a fayece dia 26 di november 1986, hopi a kere cu e partido lo a kibra. Sinembargo bou liderasgo di Sr. Nel Oduber, a lanta e animo di sostenedonan, y a hiba e partido bek na su gloria.
Bou di liderzgo di Nel nos a logra scrap e fecha di independencia, y a construi e fundeshi solido a base di finansas publico responsible y saludable, cu e unico surplusnan den historia di nos pais. Y bou di liderazgo di Nel a logra reaprtura di refineria y a soluciona e problemanan serio cu garantía.
Na augustus 2011 Nel a pasa e batuta pa e siguiente lider, y den un eleccion democrático Sra. Evelyn Wever-Croes a logra gana e confiansa di nos Congreso, y otro aña ya ta bira 10 aña cu Evelyn Wever-Croes ta lidera Partido MEP cu determinacion pa logra cosnan grandi pa Aruba.
Destino a pone cu ta un Gobierno di cual MEP a forma parti, mester a enfrenta e peor crisis cu nos pais a enfrenta. Y ta toca nos generacion awor e responsabilidad pa saca nos pais di e crisis cu e pandemia Covid-19 a causa.
“Mirando atras den e 50 añanan aki, ta hopi hende a hunga un papel importante den e partido. Nos kier gradici tur esnan cu na un forma of otro a contribui na nos partido. Y durante 2021, lo tin varios momento di conmemoracion. No por papia di celebracion manera den pasado, debi na e crisis cu Aruba ta aden, y debi na e protocolnan di Covid-19 cu nos tur mester tene nos mes na dje. Sinembargo, nos no por laga un momento asina historico pasa sin mas, y pues nos tin diferente actividad planifica, cu nos lo elabora mas riba dje na comienso di aña”, Lider di MEP Evelyn Wever-Croes a duna di conoce.
Rifa
Pa e motibo aki Partido MEP ta saca un rifa cu lo hunga dia 28 februari 2021. E premio ta un Hyundai Eon of e placa cash. Prijs pa ticket ta 5 florin y bukinan ta disponible cerca tur candidato.”Nos ta bati na bo porta atrobe, pa bo sosten. Nos sa cu cosnan ta dificil pa hopi hende, esun cu por, nos ta apreci’e enormemente, Lider di MEP Evelyn Wever-Croes a expresa.
