ORANJESTAD,Aruba
Parlamentario Endy Croes ta felicita gobierno y Minister Glenbert Croes.Durante conferencia di prensa semanal di Fraccion di MEP Parlamentario Endy Croes a felicita Promer Minister Evelyn Wever Croes, Minister Glenbert Croes y henter gobernacion kendenan a aproba e peticion di Fraccion di MEP pa extende FASE cu 3 luna mas. Nos ta traspasando den momentonan duro y e crisis aki no lo caba ni mañan ni otro luna y mester a tuma un desicion pa e ayudo por wordo extendi y sigui sostene pueblo cu ta pasando den momentonan dificil.
Gobierno a aproba peticion di Fraccion di MEP:
Parlamentario Croes a sigui splika cu siman pasa Minister Glenbert Croes cu departamentonan a duna un presentacion amplio na Parlamento. A ilustra cu mas di 16000 hende a hasi peticion mientras algo mas cu 12000 hende a ricibi e ayudo caba. Ta hopi trabou pa atende cu tur peticion den un structura cu apenas a wordo forma pa deal cu e situacion aki. Por a tuma nota cu e crisis aki no lo caba por lo pronto y ta imposibel pa despues di 3 luna di FASE laga mas di 12000 hende sin entrada. Fraccion di MEP mesora despues di e reunion a hasi un peticion official na Minister Glenbert Croes pa agrega riba agenda di Minister Raad pa trata e peticion pa extende FASE cu 3 luna mas y asina garantisa e hende cu e lo haña e ayudo pa 6 luna enbes di 3 luna y asina gobierno gana tempo pa restart economia y hendenan por haña un trabou bek. Diamars ultimo Ministerraad a aproba esaki mirando e nesecidad pa sigui brinda e ayudo.
Parlamentario Croes ta gradisi y alaves pidi pueblo tene pasenshi:
Parlamentario Endy Croes ta gradisi gobierno imensamente. Tanto Promer Minister Evelyn Wever Croes pa su liderasgo den crisis como Glenbert Croes kende a presenta y bringa pa e punto aki pero henter Ministerraad cu a aproba esaki den un forma unanime como sosten na esnan den nesecidad. Coalision a sostene e idea mientras AVP lamentablemente a vota contra presupuesto 2020 y contra tur ayudo pa esnan mas vunerabel. Pueblo lo huzga pa su mes riba e tema aki. Berdad ainda tin hende cu no a ricibi e ayudo pero ta pidi pasenshi. Asina Bo ricibie e promer biaha bo lo sigui ricibie pa maximo 6 luna. Hunto nos lo pasa den e momentonan mas dificil di historia di nos Aruba dushi tera! Danki Gobierno!