Diahuebs mainta, riba invitacion di Comandante van Wijk di Marinierskazerne Savaneta, Prome Minister di Aruba mr. Mike Eman, a haci un bishita na e base militar pa presencia e ceremonia di huramentacion di 26 miembro nobo di Arumil.
Durante e ceremonia, Prome Minister a enfatisa e importancia di e paso cu e hobennan a tuma pa sirbi nan pais den un forma profesional. Esaki ta un momento crucial den cual nos hobennan ta pone nan mes disponibel pa yuda proteha nos pais, nos comunidad, y pa yuda na momento di calamidad, tanto na Aruba como den region.
Prome Minister a indica cu e papel di Marina Real Hulandes ta fundamental den proteccion di integridad teritorial di Reino, y cu esey ta duna un sentido di certitud y confiansa pa Aruba como parti integral di e Reino Hulandes.
Prome Minister Eman a expresa su gratitud na Comandante van Wijk pa e cooperacion continuo y a recorda cu su ruman homber, mr. Henny Eman, como prome Prome Minister di Aruba, tabata un pilar importante den e fundacion di Arumil denter di e formato di Marinierskazerne Savaneta.
Comandante van Wijk mes a subraya cu Arumil ta un conexion vital entre e Mariniernan Hulandes y Aruba. “E ta yuda crea un laso fuerte entre nos y e comunidad Arubano, y duna nos un bista cla di kico Aruba ta representa y kico e mester for di nos,” Comandante van Wijk a bisa.
Den un ambiente yena di orguyo y respet, 26 hoben Arubano a completa un trayecto fisico y mental hopi pisa, y awe a huramenta como militar. Un logro pa celebra!
Prome Minister Eman a indica cu Arumil tin un rol crucial y ta carga e proyecto di Formacion Social, cual ta cera e diferencia den cultura entre e hobennan di Arumil y esnan di SVT, cual ta crea un situacion “win-win”.
Prome Minister a agrega cu gobierno ta trahando riba e posicion huridico di e militarnan di Arumil, pa asina nan por tin siguransa y continuidad den nan carera, sea den defensa of justicia manera den Kustwacht, CEA of Cuerpo Policial.
Un ehempel bibo di e posibilidadnan cu Arumil por habri, ta sr. Lourenço Teixeira, cu awe, despues di un trayecto ehemplar como “Eerste Luitenant,” a ricibi su promocion pa “Kapitein” for di Comandante van Wijk.
Prome Minister Eman ta felicita e logro importante aki pa tanto e 26 hobennan di Arumil, como pa Capitan Texeira.
