Pa esnan cu ta sigui politica di cerca, ta importante pa por analisa e situacion sin ta ciego politico. For di e fundeshi di AVP y tambe di e lidernan di bario di e partido, hopi ta esnan cu ta expresa desapunto, pero cu ta keda papia cu respet y trankilidad. Nan ta reconoce cu Mike Eman ta un tremendo persona,un persona di curason pa hende, pero cu e no ta funcionando manera un bon lider compará cu su antepasadonan, kendenan tabata purba semper di dialoga y pone e pueblo y e ideologia di partido semper dilanti.
Lamentablemente, hopi ta esnan cu ta sinti cu Mike Eman a perde e vision y e caracter di partido AVP for di aña 2016. E tempo ey, un lucha interno a cuminsa dentro di su propio partido y gabinete un pelea di poder, envidia y egoismo unda algun tabata mira otro cu mal wowo.
E Kiebro Interno y Salida di Figuranan Clave
Den e momentonan ey, Mike Eman a opta pa no mete, lagando e pelea di poder y orguyo trece un kiebro severo cu a resulta den:
• E salida di Otmar Oduber.
• E detencion di Paul Croes.
• E investigacion y despues detencion di Benny Sevinger.
Esaki a wordo sigui pa un guera habri entre e hobennan y e grandi nan di partido, cu a pone cu figuranan manera Gerlien Croes y Ryçond Raylond Santos do Nascimento tambe a opta pa bandona e partido. Cada uno a laga sa cu nan no por tabata parti di un agrupacion unda e lider no ta tuma su rol y responsabilidad, sino ta laga e politico bieu haci y deshaci. E tempo ey, e kiebro a bin na cla entre e grupo di Gerlien Croes y Ryçond Raylond Santos do Nascimento contra Mike de Meza.
Despues Gerlien Croes a lanta su mes un partido cu ta un depandanse du partido AVP , unda cu un grupo di AVP a hala hunto cu Gerlien Croes y a crea partido FUTURO , practicamente partido FUTURO ta e hala di AVP . Ryçond Raylond Santos do Nascimento tambe a lanta su mes un partido cu su propio identidad.
E Situacion Actual y e Reto di Liderazgo
Awe, den ironia di bida, e problemanan ta sigui, e biaha aki entre “Mike y Mike”. Esaki ta mustra cu un di e motibonan principal di e retiro di Eman ta e sentimento cu e no tin control mas riba e partido. Hopi hende den e fundeshi di AVP tambe ta cuminsa cuestiona su liderazgo, bisando cu a yega e ora pa e haci un paso atras, despues di 10 aña di lucha constante cu situacionnan di orguyo, envidia y egoismo interno cu no ta factibel mas pa e partido.
Ta berdad cu AVP semper a sa di prepara hobennan riba lista, pero hopi ta esnan cu ta cuestiona si e siguiente lider cu Mike Eman ta purbando di pusha ta demasiado hoben pa por carga y tuma un partido grandi asina over.Of ya caba tin lobbymento pa Geoffrey Wever bula cura pa di dos biaha y e biaha aki mane e la bandona partido RAIZ lo bandona partido FUTURO tambe y bira lider di AVP , lagando atras dos partido RAIZ y FUTURO den “doofpot”?