Minister di husticia y Departamento di Integracion, Maneho y Admision di Stranhero (DIMAS) a duna un bista detaya riba e resultadonan di e proyecto di legalisacion ‘Hunto pa Progreso’. E cifranan ta ilustra un movecion grandi den e mercado laboral, caminda un gran parti di e solicitantenan a logra formalisa nan status legal pa medio di un empleador.
Segun e datonan comparti, un total di mas of menos 6,800 persona a somete nan solicitud durante e proceso aki, buscando un caminda pa regularisa nan estadia na Aruba. For di e grupo total aki, e gran mayoria a opta pa e ruta di permiso laboral directo.
Distribucion di e permisonan
E analisis di e cifranan ta mustra un division cla den con e legalisacion a wordo ehecuta:
- Permiso cu Doño di Trabou: Un total di 4,200 persona a ricibi nan permiso legalmente vincula na un empleador, despues cu tabata varios anja illegal y kibra tur ley existente na Aruba. Esaki ta nifica cu e personanan aki ya ta fungi formalmente den e forsa laboral di e isla.
- Permiso Temporario: Un grupo di 1,591 persona ilegal a ricibi un permiso temporario. E documento aki ta duna nan e oportunidad di ta legal pa un periodo limita, maske nan no tabatin un doño di trabou registra na momento di e decision.
Reglanan estricto pa e grupo temporario
Gobierno y DIMAS a stipula condicionnan hopi specific pa e 1,591 personanan cu a haya e permiso temporario. E meta principal ta pa esaki sirbi como un “brug” hacia un legalisacion structural.
“E permiso aki tin un valides di un solo aña y no por wordo renová,” e instancianan a enfatisa.
E condicion fundamental ta cu, durante e transcurso di e aña aki, e persona mester percura pa busca y formalisa un relacion laboral. Esaki ta e unico manera pa nan por solicita un permiso regular den futuro y asina garantisa nan legalidad continuo na Aruba.
Un paso pa progreso laboral
E proyecto ‘Hunto pa Progreso’ no solamente ta busca pa duna e stranhero un paz mental, sino tambe pa combati e economia informal y percura cu mas trahado ta contribui na e sistemanan di siguridad social. Cu e cifranan aki riba mesa, e reto awor ta keda pa e grupo temporario cumpli cu e rekisitonan den e tempo stipula pa evita di cay den ilegalidad atrobe.