MAN-PIN ta kontentu ku porfin gobièrnu/Minister SOAW, sra America-Fransisca,
enkargá ku penshun di behes, esta AOV, a rekonosé dilanti penshonadonan e derechi
ankrá den e lei di AOV riba indeksashon i e debe ku tin na penshonadonan.
Djamars awor, 4 di november 2024, gobièrnu a keda di sinta na mesa ku organisashon
di penshonandonan kaminda lo papia riba diferente senario pa loke ta pago di indeksashon i e debe.
Frakshon MAN-PIN ta disponibel pa kualke sosten pa solushon pa e pago di indeksashon i tambe e debe ya eksistente na penshonadonan. Pa nos, interes di e penshonado ta riba koló polítiko. P’esei pa por kuminsá pronto ku pago di e indeksashon pa 2026, MAN-PIN, tumando nota di e presupuesto 2026 i e diferente
konsehonan ta proponé lo siguiente:
1. Aselerá e base legal ku mester pa e impuesto riba turismo ‘toeristenbelasting’.
Meskos ku a sosodé ku tratamentu di e LOK na fin di desèmber 2024.
2. Tambe nos tin entendí ku tur kos ta kla pa inisiá legalisashon di
indokumentadonan ku na momentu ku nan ta legalisá tambe ta aportá den e fondo di AOV i na impuesto en general.
3. Introdusí un rekargo riba mandamentu di sèn afo pa medio di remetido.
4. Aselerá e 5% di entradanan di LOK manera ta a keda primiti.
5. Destiná parti di e sumanan di ‘presupuesto imprevisto’ (‘onvoorzien‘) ku ta suma
miones, pa paga e indeksashon.
6. Destiná e postnan den e presupuesto yamá ‘destinashonan ainda no repatí’(‘niet
in te delen’) pa paga parti di e debe na penshonadonan pa ku indeksashon.
7. Usa parti di e reserva di 80 mion na CBCS pa paga indeksashon, meskos ku a hasi den e kaso ku penshonadonan di Ennia kaminda ta usa dividendo ku banko sentral mester paga gobièrnu.
8. Baha e fondonan adishonal ku SOAB ta manehá, esta baha e presupuesto di 22.
5 mion pa SOAB bèk na 7 mion.
Si gobièrnu ehekuta e proposishonnan aki, lo bin mas ku e 100 mion pa aña liber ku
mester pa paga indeksashon i sobra sèn pa por paga riba e debe eksistente.
Mester tene bon na kuenta ku e indeksashon i pago di debe lo resultá den mas konsumo lokal i konsekuentemente lo stimulá ekonomia i duna entrada adishonal na kaha di gobièrnu. E entrada adishonal aki tambe por sirbi pa sana e fondo di AOV
strukturalmente, p.e. dor di invertí esakinan i uza e rendimentu pa sigui ahustá AOV.
Manera nos a bisa minister di SOAW den parlamento, e por konta ku koperashon di frakshon MAN-PIN den Parlamento na interes di penshonadonan di AOV.
Press release: MAN-PIN