Bonaire

Anochi ku luna yen 24 di febrüari na kunuku laguna serka famia pourier na gotomeer ku tema ‘un bista na horizonte’

Anochi Ku Luna Yen 24 Di Februari Na Kunuku Laguna Serka Famia Pourier Na Gotomeer Ku Tema ‘Un Bista Na Horizonte

Djasabra 24 di febrüari 2024 tin e evento ‘Anochi Ku Luna Yen’ di  19:00 – 21:00 or na Kunuku Laguna, serka famia Pourier na Gotomeer. Tema  di e anochi ta ‘Un bista na horizonte.’ Poko poko pero sigur e barku ku yama ‘Binti Aña’, a kuminsá aparesé na horizonte. Falta un luna i algun dia pa e fecha históriko. E fecha ku 20 aña pasá a planta simia pa ‘Anochi ku Luna Yen’. Esei a sosodé na Tra’i Montaña den kurá di Uchi ku Balentin. Binti aña pasá Regina ‘Uchi’ Frans i su amiga Munye Oduber-Winklaar a para na kuna di ‘Anochi ku Luna Yen.’ Durante e enkuentro di 24 di febrüari  2024,  lo para ketu na e fecha históriko akí i plannan pa selebrashon di e aniversario. 

Anochi ku Luna Yen’ ta un evento ku  entre otro deklamashon di poesia, kontamentu di kuenta den lus di luna. E ta un un evento sosial di pueblo i pa pueblo, pues un i tur ta kordialmente bonbiní. Ta un di e aktividatnan ku Sekshon di Kultura, Arte i Literatura, SKAL, tin den nan agènda kultural. 

Hende di Rincon òf Playa ku tin mester di transporte, por hasi uso di un bùs ku ta sali for di Rincon 18:00 pa buska hende. E bùs akí ta pasa 18:30 na  SKAL na Playa pa buska hende i  sali despues rumbo pa Kunuku Laguna. Ta pidi tur esnan ku ke hasi uso di e servisio di bùs, pa reservá na tempu na SKAL òf yama +599 715 5323. Asina nos por sa kuantu hende mester di transporte.   

Manera semper, ta keda liber na kada bishitante pa trese algu di boka dushi pa kompartí ku otro bishitante. Ta supliká tur hende bini ku nan propio stul. No balotá bo talento i bin demostrá ku bo por. Nos ta apresiá i respetá tur presentashon pero tin sierto regla sí. Nos no ta tolerá palabra bulgar, politikeria, atake personal i tur otro kos ku no ta kuadra ku meta di e evento. 

Anochi ku Luna Yen ta un inisiativa ku a nase den pasado for di algun siudadano ku gran pashon pa nos idioma papiamentu. SKAL ta keda pone énfasis ku meta prinsipal di e evento ta pa stimulá otro pa skirbi, deklamá, konta kuenta, kanta òf presentá obranan kòrtiku na papiamentu.

Pa mas informashon por tuma por tuma kontakto ku kolaboradónan:

Magali Sumter  +599 9 565 0947

Ubaldo Anthony +599 717 4935

Orlando Francisca  599 786 2131 òf +599 7962131

SKAL +599 715 5323

Related posts

Rekonosementu na baluartenan: Sekshon di kultura ta lansa pòtpuri di tumba

EA News Author

Bonhata ta positivo tokante e proyekto piloto pèrmit di trabou

EA News Author

Pronóstiko di tempu pa Boneiru Djaweps 07 te Djabièrnè 08 Yanüari 2021

EA News Author

Leave a Comment

Whatsapp Message