CuracaoPolitica

Sra. Giselle Rosalia : Bo tin hopi kurashi un bergwensa nashonal

Gisela Rosalia

Promé Minister Rhuggenaath ta kulpando e yu di Kòrsou ku t’e ta kulpabel pa e echo ku e pandemia a empeorá aki na Kòrsou. Pero ban analisá. E promé kaso di covid na Kòrsou tabata di un stranhero ku a bini aki den temporada di karnaval i a move meimei di yen hende aki. Nos a keda basta tempu sin infekshon i esaki pa motibu di un komportashon masha bon mes di pueblo di Kòrsou ku a tene nan mes masha bon mes na e regla i palabrashonnan.

Gobièrnu a anunsiá ku nan ta bai habri pa Hulanda i un gran mayoría di pueblo tabata kontra di e desishon aki. Despues ku a habri a presentá e promé kontagio lokal. Pues análisis lógiko ta bisa ku e infekshon a bini di afó pero manera na tur país ku e pandemia plama i ekstendé ta bou di e poblashon esaki ta sosodé pasobra stranheronan ku drenta un país ta keda un temporada kòrtiku. Sinembargo nan ta move den pueblo i  tin kontakto direkto ku pueblo ku ta laborá entre otro den hotèl, horeka, banko, pakus, negoshinan i demas. E turista biahero ta ún yu di Kòrsou so e mester infektá ta kla. E turista ta drenta avión bai bèk su país. E yu di Kòrsou ei ta bai su kas i sigui pega famia, amigu i konosí. Mas pio ainda ora e no ta sinti niun síntoma e ta infektá i por lo tantu  ta plama e virus!

Ta p’esei  paísnan responsabel i ku nan gobièrnu ku tin interés di nan siudadanonan na pechu ta  sera nan frontera pa stranhero espesialmente esnan di paisnan di rísiko haltu manera Hulanda. Esaki ta igual den tur país. Minister Rhuggenaath ta ripití i keda bisa pueblo di Kòrsou ku ta yu di Kòrsou ta iresponasabel i ku ta nos mes ta plama e virus den skol, empresa, instituto, hòspital etc. Si e virus drenta Kòrsou ta bou di yunan di Kòrsou ku tin kontakto diario manera na trabou i na kas den seno di famia e ta sigui plama. Esei ta normal manera den tur país. Ora a bolbe introdusí reglanan mayoría yu di Kòrsou ta kumpliendo ku esaki. Relatonan di polis ta bisa bon kla ku pueblo a obedesé i ta kumpli ku algún eksepshon aislá. Pues ta un grupito masha chikí tin ku no ta komportá. Un kantidat di nan ta mal kontentu i no kier tene nan mes na regla pasó nan ta mira ku den e asuntu di Covid aki tin midimentu ku diferente midí.  Nan ta tuma nota ku tin un grupo hopi grandi di makamba AKI NA KÒRSOU no ta obedesé i kumpli ku niun regla pasó nan ta haña ku ta trata di un simpel grip i no por priva nan di nan libertat.

Ta dikon minister Rhuggenaath ku mester sa mihó ta insultá  nos inteligensia, brongosá yu di Kòrsou i sigui makista nos tantu asina komo pueblo E pueblo ku abo komo opperbevelhebber a subi su desempleo, kòrta den su enseñansa i deporte, laga su enseñansa desampará sin minister, sin maneho di krisis pa den e pandemia aki, sin un kuríkulo adaptá pa krea yunan di Kòrsou nobo, kapas di saka e lugá aki dilanti,  kaminda e tim di maneho i su dosentenan ta kreativo i ta traha ku alma i kurpa ku amor pa nan vokashon hasiendo milager pa nos alumnonan,  e pueblo ku bo a oprimí su kultura serando Kas di Kultura, e pueblo ku bo a mata su farandula,  e pueblo ku ta kome for di konteiner pasó 95% di loke e ta konsumí ta ser importá, e pueblo ku bo ta priva di su playa i su kostanan ofresiendo esakinan na stranhero i gran kapital, bende tur su patrimonionan pa dòria dòsplaka , e pueblo kaminda e grandi ku ta portadó di konosementu i eksperenshá no ta ser balorá ni apresiá, un hubentut ku ta krese den un país kaminda e no ta mira niun klase di perspektiva, ku no ta lag’é sintié orguyoso, (komprometé) ni no tin amor pa e patria aki, pasó bo no a kultiv’é den dje. E pueblo kaminda esun ku un desabilidat mental òf físiko ta ser apartá, isolá i no a krea posibilidatnan pa e integrá den e komunidat aki.  Ta Kiko nos a hasi e hòmber aki?  Anto e chèri riba e bolo MALBADO ta bin ora e mésun minister Rhuggenaath ta bisa na bos haltu na prensa hulandes i e pueblo hulandes ku Kòrsou ta keda habrí pa turista hulandes pasobra e subida di e kantidat di infektadonan na Kòrsou ta pa motibu di mal komportashon di pueblo  mes. Pa kiko keda insultá nos? Pa kiko alabá e makamba i bis’é ku e ta bon biní siendo ku e ta bini di un pais ku ta mal afektá pa e virus di korona?. E mésun makamba ku ta ta bon biní na Kòrsou na mes momento no ta bon biní den praktikamente niun país serio na mundo. Serka nos so nan ta bon biní. Awor bon biní pa ki motibu? Pa motibu ku pa minister Rhuggenaath plaka i ganashi ta mas importate ku salú di hende. Minister Rhuggenaath a entregá Kòrsou den man di Hulanda ku e meta pa nan uza nos komo trampolin pa KLM, Corendon ku TUI sigui hasi nogoshi den Caribe i Sur Amerika i sigui gana plaka brutu. Minister Rhuggenaath a makista nos, abuzá di nos, brongosá nos pa por kumpli ku KLM, TUI i Corenden esta gran kapital Hulandes i Gobièrnu Hulandes i nan nogoshinan aki na Kòrsou. Si nos ta asina mal komportadó i ku kontagionan ta sigui subi, dikon minister Rhuggenaath no ta para vuelonan di KLM, Corendon ku TUI  pa asina yuda baha e risiko pa nos poblashon? Pasobra biahero di un país ku kodigo kora no por ta bon biní den niun país ku ta respetá i balorá su mes. Den desèmber awor ta bini mas avión pa aterisá aki na Kòrsou. E biaha aki for di Merka otro país ku kontagio desbordante. Pueblo bo ta komprondé ta pakiko ta papia malu i sigui makista nos? Bo ta komprondé dikon ta hunga e wega sikológiko aki ku bo? Ta pa bo keda sumiso i sinti bo mes kulpabel di e sifranan ku ta keda subi tur dia?   Pasobra nos gobièrnu ta sirbiendo kapital. Kapital ta mas importante ku salú, bienestar i bida di hende. Ta esei ta minister Rhuggenaath sostené pa PAR i MAN.

19 di mart 2021 abo tin e yabi pa e kambio den bo man,  Pasó Por otro. Kousa Promé.

Related posts

Minister Rocco Tjon: Reunionnan den cuadro di reapertura di frontera cu venezuela ta continua

EA News Author

Nos talentonan local a briya durante manifestacion cultural Himno y Bandera

EA News Author

Dia emanshipashon mester sirbi komo un dia di reflekshon profundo riba nos pasado i pa nos sigui traha riba nos emansipashonkomo pueblo

EA News Author

Leave a Comment

Whatsapp Message