Morango di Amor, of traduci Strawberry di Amor, ta un tipo di ‘cos dushi’ cu a bira un fenomeno viral riba rednan social na e pais di samba. Su receta ta masha facil ta uza un strawberry di berdad, lora den un mansa yama brigadeiro y gedip den un glaze cora.
Mescos cu dessertnan manera bolo di Red Velvet cu un paar di aña pasa a bira masha popular na Estados Unidos y tambe a yega nos isla. Arubianonan y nos rumannan di islanan bisiña, tin un gusto pa cosnan dushi, esaki nos por mira claramente den nos cosnan dushi local, manera Cocada, Pansuiker, Dushi di Pinda, Chuculati-pinda etc etc.
Nos hendenan tin un djente dushi of ‘sweet tooth’ manera nan ta yame na ingles, ta pesey EA News ta bay inclui e receta pa traha e Morango di Amor.
Su storia ta masha romantico y e cos dushi ta inspira ariba ‘Candy Apples’ cu ta un cos- dushi hopi popular mes na Merca, cu ta consisti di un appel geglaze cu sauce di sucu carameliza.
Basa ariba e idea aki, na Brazil algun confecionario di cosnan dushi a dicidi di experimenta cu e mesun idea, pero toch mas special. Na Brazil Candy Apples ta wordo yama ‘ Manzana di Amor’ y di esey a cambie na Morango di Amor.
Morango di Amor, ta consisti di un strawberry laba y pela, despues di lage seca ta pase den palo di sate. Mientras tanto riba stoof bo ta cuminsa traha e ‘brigadeiro’ cu ta un combinacion di lechi condens, gemix cu cream milk ( lechi den bleki), manteca y chuculati blanco. Mix, e lechi condens cu e cream y e manteca, ponenan herbe riba candela medium. Ora cu e cuminsa herbe agrega e chuculati blanco y mix tur cos hunto te ora e consistencia bira di un dulce de leche. Pone e mescla descansa pa 4 ora, lora den un plastic wrap na temperatura di ambiente.
Pa traha e ‘glaze’ pa bo dip bo strawberrynan aden, ta un tiki dificil, special si bo no
hasie bon.
Mix sucu blanco cu awa y un tiki vinager, tira un par di gota di food coloring color cora den e baki y mescla tur cos te ora cu e sucu disolve y e mix tin e briyo bunita di candy apple. Pone e mezcla riba stoof te ora cu e cuminsa saca bubbles, no ta recomenda pa draai e mezcla ora bo tine riba stoof.
Pa traha nan, coy e strawberry den e palo di sate y lore den e brigadeiro, manteniendo e forma harmonioso di e strawberry, dip esakinan den e ‘glaze’ y ponenan den un schaaltje of un di e matnan di silicone, te ora nan bira duro. Ora cu nan ta duro nan ta cla pa wordo sirbi pa bo amigonan y famianan cu gusta cosnan dushi diferente. Trahe na cas, medionan social ta facil pa busca e recept, prome cu nan bisa bo di dje, bisa nan den EANews ba tende di dje.