Politica

TA CONSEHABEL PA ARUBA SERA TUR FRONTERA E SIMANNAN NOS DILANTI


ORANJESTAD,Aruba

Parlamentario Tevreden ta di opinion cu tin di cuminsa prepara pa sera frontera pa bishitante di merca tambe.

Siman pasa dia 11 di maart 2020, WHO a proclama e corona virus como un pandemia. Pandemia simplemente ta nifica cu e virus awor a plama y ta den multiple Pais mundialmente na e mes momento, riba 112 pais awor caba. Den e ultimo dos simanan e casonan a multiplica 13 biaha y locual cu ta hasie asina precupante ta cu algun Pais no a tuma e precuacionan necesario of a tuma nan mucho laat.

Aruba, apesar di ta un isla chikito, a actua den un forma relativamente liher. Nos tin di remarca cu minister di Salubridad a maneha e caso den un forma sublime, y awor cu e situaion a escala na nivel nacional, e ta pasa den man di minister Presidente Wever Croes, kende sin duda cu esaki lo continua tuma e pasonan necesario.
Naturalmente tin di subraya y yama danki na tur nos profesionalnan, cada un den nan propio ramo cu a bin ta hasiendo un trabou riba nivel y standard internacional. Nos ta un isla bendishona.

PERSONA CONTAGIA CU E VIRUS

Diabierna ultimo nos a registra Aruba su prome dos casonan di corona virus (COVID19). Si nos analisa con e virus ta comporta y tambe con liher e por plama, lo ta prudente pa amplia e restriccionan na nos fronteranan. E dos personanan contagia a bini di Merca, y nos no sa cuanto bishitante di Merca por ta contagia. Merca ta e grupo di mas grandi cu ta bishita nos isla y hustamente esaki por ta un peliger pa nos cuidadanonan.

Tin di remarca si, cu ya caba minister Presidente a tuma e pasonan preventivo pa sera scolnan, cancela tur actividad publico y priva, a sera frontera cu Europa, y a prohibi bishita na nos casnan di cuido cu ta e grupo mas vulnerabel.

UN DECISION HOPI DIFICIL

Si sera frontera e lo sirbi pa duna nos dunadornan di cuido e espacio pa atende esnan contagia y sigura mas tanto posibel cu e virus no sigi plama. Como cu sintomanan di e virus ta tuma algun siman pa por presenta nan mes serca un cargador. Unabes cu tin siguransa cu Aruba tin e casonan bou control, lo por habri frontera cu control pa evita cu personanan contagia lo bolbe drenta.

Sinembargo no por sera wowo pa e realidad, cu un desicion asina lo tin consecuencianan economico  grandi. Manera ta conoci e situacion financiero malo cu Aruba a hereda di e gabinete anterior a debelita nos finansas publico cu ta hasi nos pais mas vulnerabel den momentonan manera esaki. E decision no ta uno facil, sea ta baha nos entrada economico, pa sigura e salud di nos pueblo, o ta scohe pa mantene frontera pa Merca habri, cu tur posibel consecuencia di esaki. Mi no tin duda cu minister Presidente Wever Croes, lo scohe pa pone nos hendenan y nan salud central, parlamentario Tevreden ta termina di bisa.

Related posts

Prijsnan maximo di productonan

EA News Author

Parlamentario Benny Sevinger: Pa falta di vision y interes propio sector di enseñansa ta sigui den problema

EA News Author

Parlamentario Mervin Wyatt-Ras: Gobierno te ainda no tin un plan social-laboral pa atende cu desempleo y pobresa

EA News Author

Leave a Comment