Siman pasa a pone dos paso importante pa ejecucion di e trabounan den centro di ciudad na Playa (centrumgebied). Ta trata aki di e proyecto Kaya Grandi y bisindario. Na prome lugar a firma e acuerdo cu e contratista. Seguidamente riba diabierna 14 di augustus un seshon di informacion a tuma lugar cu habitantenan y empresarionan cu ta stablecí den area di e proyecto. Durante e encuentro aki a splika cual ta e trabounan cu ta keda ehecuta, con e planificacion den linianan grandi y e reparticion den fase ta y kiko esaki ta nifica pa e bisindario. E siman aki e trabounan a cuminsa.
Segun expectativa e duracion total di ejecucion di e proyecto ta siete luna. E trabounan ta encera entre otro riba mehoracion di desagwe di awacero y un estructuracion mehorá di e espacio publico, caminda e diferente funcionnan den centro di ciudad ta haya nan espacio cu ta necesario. Di e manera aki ta surgi un estructuracion coherente y funcional di nos centro di ciudad.
Den combersacion cu habitantenan y empresarionan Durante e seshon di informacion tabatin espacio pa habitantenan y empresarionan haci pregunta y comparti nan preocupacionnan y nan puntonan di atencion. E aporte aki ta yuda pa sincronisa e ejecucion mas mihor posibel cu uso diario di e area.
E hefe suplente di directorado di Planificacion y Desaroyo, Ligwino Leito, ta pone enfasis riba importancia di e colaboracion aki: “Cu firmamentu di e acuerdo nos ta pone un paso importante den direccion di e ejecucion. Nos sa cu trabou den centro di ciudad tin impacto riba habitantenan, empresarionan y bishitantenan. Pa e motibo aki nos ta haya cu ta importante pa duna informacion na un manera cla, scucha bon kiko ta biba cerca e hendenan rond, y keda den contacto cu e bisindario durante e ejecucion. Di e manera aki nos ta traha huntu pa logra un centro di ciudad cu ta mas atractivo, mas accesibel y mihor structura pa futuro.”
Alcanzabilidad durante e trabounan Durante e ejecucion tur edificio ta keda alcanzabel na pia. Pa e peatonnan nos ta crea ruta di cana sigur y bon cla demarca. Tambe e area di proyecto ta keda alcanzabel pa servicionan di emergencia.
Caminda seramentu di caya or desviacion temporal ta necesario, nos ta comunica adelanta tocante esaki. Durante e ejecucion, Entidad Publico Boneiru ta keda duna informacion tocante e progreso, e diferente fasanan y eventual cambionan den alcanzabilidad.
Cu inicio di e trabounan nos ta pone un siguiente paso concreto den mehoracion mas aleu di e espacio publico den centro di ciudad na Playa.
