E aña aki a marca un logro special pa TUI fly Hulanda, e compania di aviacion ta cumpli 20 aña di conecta Amsterdam y Aruba. Pa conmemora e asociacion di dos decada aki entre Hulanda y nos “One Happy Island”, TUI a organisa un “Feestvlucht” (buelo di celebracion) riba dialuna, 3 di november 2025, prome cu e aniversario oficial.
E celebracion a cuminsa na Aeropuerto Schiphol di Amsterdam, caminda e pasaheronan a disfruta di un evento special di send-off. E Pasaheronan cu a biaha riba e vuelo conmemorativo aki a disfruta di un ambiente festive for di porta pa cabina, cu algun sorpresanan durante e biahe.
20 aña di conexion y crecemento comparti
Desde inicio di operacion na november 2005, TUI fly ta un partner clave pa conecta e mercado Hulandes cu Aruba. E ruta, cu ta bula un biaha pa siman riba dialuna, cu un Boeing 787-8 Dreamliner cu aproximadamente 307 asiento disponibel. Durante e ultimo dos decadanan, e conexion aki a contribui significativamente na desaroyo turistico di Aruba, facilitando intercambio cultural y fortificando lasonan dentro di Reino Hulandes.
Jo-Anne Arends, Aviation Business Development Executive na AAA, a comenta cu: “TUI a resulta di ta un partner confiabel y consistente den conecta Aruba cu Hulanda. E logro di 20 aña aki t’un prueba di e forsa di nos aliansa y e compromiso comparti cu excelencia cu ambos organisacion ta sostene. Den transcurso di e añanan, TUI Fly no solamente a trece un sin fin di biahero y turista pa nos isla pero tambe a sostene e biahenan di studiantenan local, famianan y profesionalnan cu ta biaha entre Aruba y Amsterdam. E conexionnan aki a fortalece nos comunidad y a profundisa e relacion entre nos isla y Hulanda. Door di celebra e logro remarcabel aki, nos ta anticipa tambe pa crecemento continuo, innovacion y sostenibilidad den e decadanan venidero.”
Compromiso cu futuro
TUI fly ta keda comprometi na fortalece su operacionan den Caribe mientras ta promove biahenan responsabel y sostenibel. Hunto cu su partnernan local, TUI lo sigui innova, inspira y percura pa bishitantenan for di Hulanda por experencia e bunitesa y hospitalidad cu ta defini Aruba, e “One Happy Island”.
Tocante TUI fly
TUI fly Netherlands ta opera vuelonan pa destinacionnan ront Europa, Africa y Caribe. Como parti di TUI Group, un di e negoshinan di turismo lider na mundo, e compania di aviacion ta conecta e biaheronan na mas cu 70 destinacion rond mundo, cu un enfoke fuerte riba servicio, comodidad y sostenibilidad.
Tocante Aeropuerto di Aruba
AUA Airport ta un di e aeropuertonan mas ocupa den region Caribe, cu mas di 24 diferente aerolinea operando na Aruba contribuyendo na mas cu 3.2 miyon pasahero pa aña y brindando servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 75% ta di Merca y Canada, 17% ta di Latino America, 4% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu e instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.
Haya sa mas di loke ta sosode na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport, TikTok.com/@arubaairport y Linkedin.com/ArubaAirport.
Press release: Aruba Airport Authority N.V.
