E barku di Marina Zr.Ms. Groningen i Wardakosta Karibe Hulandes djaweps i djabièrnè mardugá a interseptá dos transporte di droga i a konfiská kasi 2.000 kilo di droga.
E barku di Marina Zr.Ms. Groningen, nabegando pa Wardakosta Karibe Hulandes, durante mardugá di djawebs a interseptá un transporte di droga. Zr.Ms. Groningen despues di e detekshon di e boto sospechoso a lansa dos boto rápido di intersepshon di e barku patruyero, e asina yamá FRISC, pa interseptá e go-fast nan. Una bes na un distansha serka, e FRISC huntu ku e tim di Wardakosta Karibe Hulandes, Skuadron di Infanteria di Flota (Fleet Marine Squadron) i e tripulashon di Zr.Ms. Groningen, a identifiká nan mes na e boto sospechoso, pa medio di sende nan lusnan ’zwaailicht’ blou. Despues di esaki e boto a purba hui ku un velosidat haltu i e tripulashon a kuminsá tira paketenan den laman. Durante e pèrsekushon a dispará tirunan di atvertensha, i finalmente un di e motornan di e go-fast mester a keda desaktivá pa medio di tirunan dirigí. E sinku sospechosonan na bordo di e go-fast finalmente a entregá nan mes. E tim di e FRISC a saka e paketenan ku a keda tirá den laman.
E siguiente mardugá a bolbe detektá un go-fast den laman Karibe. E biaha aki tabata trata di un go-fast ku shete persona na bordo. Despues di e detekshon di e kontakto, e dos botonan rápido di intersepshon di e barku patruyero, esta e FRISC-nan, a keda lansa pa interseptá e go-fast. E 12 sospechosonan di e go-fastnan ku nashonalidat Venezolano, ademas di e kontrabanda a keda entregá na Kuerpo Polisial di Kòrsou. Un total di kasi 2.000 kilo di droga e keda konfiská riba e dos go-fast nan.
Zr.Ms. Groningen desde mei 2023 ta aktivo komo barku patruyero den region Karibe, i ta kombiná e operashonnan anti-droga ku sosten na Wardakosta Karibe Hulandes huntu ku dunamentu di asistensia humanitario.
