ACE Foundation a selekshoná sinku hoben pa partisipa den evento kultural na Amsterdam
Después di 7 aña, Boneiru ta bolbe partisipá den e Young Creators Festival na Hulanda. ACE Foundation a prepará i selekshoná sinku hoben talentoso pa representá Boneiru den e gran evento kultural pa hobennan kreativo. E grupo di hoben lo sali pa Hulanda dia 24 di yüni i lo keda te dia 29 di yüni.
E hobennan ku lo bai ta:
Zaymari Rojas – baile/aktris/deklamado
*Davenley Lauffer – baile
*Valeria Lara – Kantante
*Romy Ridderbeks – Kantante/aktris/spokenwords
*K’Jar Martines – DJ/MC
Nan a wordu selekshoná a base di anna loyalidat, disiplina i kompromiso ku e programa di desaroyo di talento ku ACE Foundation ta ofrese pa hobennan entre 12 te 18 aña. Durante un aña kompletu, nan a tuma parti den diferente tayer i a hasi presentashon riba Boneiru i Aruba. Awor nan ta kla pa subi un podio internashonal: De Melkweg na Amsterdam lo ta e esenario ku un oudiensia di mas ku 500 hende.
De Melkweg ta un sentro kultural famoso den Amsterdam, konosí pa duna espasio na talento nobo den músika, teatro i arte. Dia 28 di yüni, e hobennan di Boneiru lo presenta un show di 15 minut ku kombinashon di baile, kanto, poesia i DJ. Ademàs di e show, nan lo partisipá den diferente tayer kultural i nan lo bishitá akademianan di arte pa mira ku tin e posibilidat di komberti un hobbi den un karera profeshonal. E bishita aki a bira posibel ku yudansa di Oranjefonds/Samenwerkende Fondsen, Cultuurfonds Caribisch Gebied i Stichting Kunstbende Nederland ku ta kontentu ku Boneiru ta partisipá un biaha mas na nan festival.
Marlies Vels, direktora di ACE Foundation, ta bisa:
“Nos ta hopi orguyoso di e hobennan aki. Nan dedikashon i talento ta duna nos gana di sigui hasi mas pa nan i pa sigur nan por inspira otronan. Nos ke nan wak ku e mundo kreativo tin hopi posibilidad pa nan futuro.”
ACE Foundation ta deseá e hobennan di Gang di Arte hopi éksito den nan biahe kultural na Hulanda.