Konseho Sosial Ekonómiko (SER) a risibí djabièrnè 26 di yüni último un delegashon di Ministerio di Asuntunan Interno Hulandes i Relashonnan di Reino (BZK). E bishita tabata un enkuentro di konosementu, kaminda a papia tokante e situashon sosioekonómiko aktual di Kòrsou i e papel di SER komo órgano independiente di konseho.
E delegashon hulandes a konsistí di señor René Bagchus, direktor di e Direktorado di Relashonnan den Reino, señora Simone Augustuszoon, konsehero di maneho, i señora Marieke van der Linden. Ta spera ku señora Van der Linden lo kuminsá na luna di ougùstùs próksimo komo Representante Suplente di Hulanda na Willemstad.
Durante e enkuentro, SER a splika su papel komo órgano independiente ku ta duna konseho riba asuntunan sosio-ekonómiko. SER a pone énfasis riba e forma ku e ta traha ku representantenan di dunadónan di trabou, trahadónan i miembronan independiente pa yega na konsehonan ku tin un base amplio den komunidat.
Den un ambiente habrí i konstruktivo, a papia tambe tokante desaroyonan sosio-ekonómiko ku ta tuma lugá na Kòrsou i e retonan ku nos pais ta enfrentá. E partisipantenan a kompartí nan pensamentu riba importansia di diálogo, konsenso sosial i preparashon kuidadoso di maneho públiko.
SER ta mira bèk ku apresio riba e bishita di kortesia aki. Enkuentronan manera esaki ta yuda na alsa komprondementu mutuo entre institutonan i ta duna un bon base pa kontaktonan den futuro. Pa SER, diálogo struktural i respetuoso ta keda un elemento importante pa kontribuí na un desaroyo sosio-ekonómiko ekilibrá, mas inklusivo i sostenibel pa Kòrsou.