Nos a ricibi un buki special pa mucha. Un buki pa mucha tocante temanan importante manera Aruba su formacion, su flora, su fauna, su historia, hendenan y industria, su cultura, turismo y sostenibilidad. Esaki ta un produccion di team di Aruba Excellence Foundation cu ta consisti di Giovanni de Windt, Melissa Robert, Susana Romero y Sharenda Clarinda. Ilustracion ta di Yohandy Larmonie.
A.C.P. pa mucha ta un produccion masha bunita mes pa tur mucha na Aruba. E siman aki Giovanni de Windt & Melissa Robert ta duna presentacion di nos Flora y Fauna y mas topico na scol den cuadro di Festival di Buki pa Mucha 2025. Meta ta pa ekipa mucha rond Aruba cu informacion importante di nos isla.
Produccion ta den partnership cu Aruba Tourism Authority Aruba (ATA), Museo Arqueologico Nacional Aruba (MANA), Aruba Conservation Foundation (ACF) y Archivo Nacional Aruba (ANA).
Aruba Excellence Foundation a wordo institui door di Aruba Tourism Authority (ATA) na aña 2018 y ta e fundacion encarga pa entre otro ehecuta e Aruba Certification Program (A.C.P.).
E mision y obhetivo principal di Aruba Excellence Foundation ta, pa stimula y desaroya programanan di entrenamento cu ta enfoca pa ofrece informacion corecto y consistente tocante Aruba.
https://www.bibliotecanacional.aw/pages/aruba-excellence-foundation-ta-participa-na-nos-festival-di-buki-pa-mucha/
Press release: Biblioteca Nacional Aruba
