Minister Robbert Dijkgraaf (Educacion, Cultura y Sciencia) ta bishita Corsou, Aruba y Boneiro di 15 te cu 20 di januari. E bishita ta den cuadro di e reunion Ministerial di cuater pais pa Educacion, Cultura y Sciencia y conmemoracion di historia di sclavitud. Minister Dijkgraaf ta encarga cu e coordinacion di e Aña di Conmemoracion pa Historia di Sclavitud, cu ta inicia dia 1 di juli e aña aki.
Na Corsou Minister Dijkgraaf hunto cu Secretario di Estado Gunay Uslu (Cultura y Media) lo forma parti di e ‘Ministerieel Vierlandenoverleg’ anual pa Educacion, Cultura y Sciencia. E tema principal ta e cooperacion entre e paisnan dentro di reino riba tereno di educacion y sciencia. Lo trata entre otro e fortificacion di educacion Caribense y e conexion cu estudio avansa. Dijkgraaf lo reuni tambe cu Gobernador Lucille Andrea George-Wout y e minister Rodolphe Samuel (Educacion, Cultura, Hubentud y Deporte) di Sint Maarten.
E historia di sclavitud lo hunga un rol grandi durante e bishita. Na Corsou minister Dijkgraaf hunto cu representantenan di ‘Plataforma Sklabitut i Herensia di Sklabitut’ lo tende un consulta cu otro y e lo bishita National Archaeological Anthropological Memory Management (NAAM). Su bishita na Band’abou tambe ta den cuadro di historia di sclavitud, specificamente Tula, cu na 1795 a lidera un resistencia contra sclavitud na e isla. E Gobierno Hulandes lo – siguiendo Gobierno di Corsou – rehabilita Tula su nomber. Na Universidad di Corsou minister Dijkgraaf lo combersa cu studiantenan tocante e conmemoracion di e historia di sclavitud.
Banda di esey e ta bishita e scol di hotel, un cooperacion entre ROC Mondriaan, Curaçao Hospitality & Tourism Association (CHATA) y Curaçao Tourist Board (CTB). E scol di hotel ta prepara studiantenan di nivel MBO profesionalmente den e sector di turismo y hoteleria. Na Corsou minister Dijkgraaf lo bishita Caribbean Research and Management of Biodiversity (Carmabi) tambe. Esaki ta un instituto cu ta ehecuta estudionan riba tereno maritimo y ta supervisa tres parke nacional na Corsou.
Aruba
Na Aruba minister Dijkgraaf tin un reunion cu Gobernador Alfonso Boekhoudt y lo reuni tambe cu Minister Presidente Evelyn Wever-Croes, minister di Educacion y Deporte Endy Croes y Minister di Finansas y Cultura Xiomara Maduro tocante educacion y historia di sclavitud.
Tambe e lo bishita Colegio San Nicolas (educacion secundario), instituto di educacion Instituto Pedagogico Arubano (IPA) y Mon Plaisir school (scol basico). Na Colegio San Nicolas lo trata e topico di preparacion pa educacion avansa. Na IPA y Mon Plaisir school e tema lo ta e colaboracion entre formacion profesional y scolnan (basico). Na Universidad di Aruba lo toca diferente tema den combersacion cu e studiantenan.
Boneiro
Minister Dijkgraaf lo combersa cu Colegio Ehecutivo y bishita ‘Brede School Papa Cornes’ (Scol pa educacion basico). Despues e ta sigui cu su bishita pa MBO Bonaire, cu como tema principal alocacion di educacion y preparacion pa estudio avansa. E minister lo combersa tambe cu miembronan di grupo di trabou di 1 di juli, hunto cu entre otro representantenan di FuHiKuBo (Fundashon Históriko Kultural Boneriano). Un organisacion Boneriano cu ta ocupa su mes cu registro di historia di Boneiro. E ta bishita y combersa tambe cu e studiantenan di Scol di Idioma.
Na caminda pa e incio di Aña di Conmemoracion di Historia di Sclavitud e minister lo bishita Surinam, Sint Maarten y Sint Eustatius tambe durante comienso di aña.
1 comment
[…] Source link […]