Diasabra 24 di mei, durante e klousura di Siman di muzik pa mucha, ACE Foundation a lansa ku gran orguyo su radio online: Kiddie Beats – un plataforma dediká kompletamente na música i programa pa mucha. E kanal di radio ta dirigi pa Xechel Jacobs i e idea a nase di e vishon di Segni Bernardina, ex-direktor i fundador di ACE Foundation.
Kiddie Beats a yega pa yena un bashi importante den medio lokal. “E tabata molestiami semper ku e echo ku radionan lokal of DJnan no ta duna apoyo na música pa mucha,” Segni Bernardina a bisa. “Awor ku nos tin teknologia moderno, nos por pone música pa mucha disponibel na tur momento i tur luga.”
Ora Segni a konta e idea na Xechel, su reakshon tabata inmediato i yen di pashon. “Mi no a drumi hinter anoch!” Jacobs a bisa. “Mi a traha riba e idea henter anochi i den 24 ora mi a traha e prome progama kompleto. E ta sinti bon.”
E radio ta sigui e pasonan di Radio Panchito, fundá pa Tio Toni Angila, un hende ku a dedika hopi tempu i amor pa e desaroyo di mucha na Boneiru. Radio Panchito ainda ta online, transmitiendo música pa mucha den un manera pasivo. Kiddie Beats ta agrega un manera mas aktivo, moderno i interaktivo.
Kiddie Beats ta transmití via e siguiente link: https://zeno.fm/radio/kiddie-beats-fm/
Ademàs di e radio online, tur podcast i programa spesial tambe ta disponibel riba
YouTube na kanaal di kiddiebeats: https://youtube.com/@kiddiebeatsfm
E lansamentu aki ta simbolisá un paso nobo den media pa hobennan na Boneiru – ku edukashon, kreatividat i entretenementu komo su base. Famia, skol i organisashon ta keda kordialmente invita pa sintonisa i duna sosten na e plataforma feliz aki kaminda e mucha mes ta e protagonista.
Pa mas informacion: ACE Foundation
Email: acesbonaire@gmail.com
Telefòn: +599 790 0155
Facebook: @acefoundationbonaire
