E Autoridad di Comercio Honesto di Corsou (FTAC, Fair Trade Authority Curacao) a impone multanan administrativo dia 1 di augustus ultimo cu a pasa di e aña aki contra di doño di dos supermercado.
Nan a haña e multanan aki pasobra nan no a cumpli cu nan obligacion legal di cooperacion durante un investigacion den e sector di alimento.
E kaso ta trata di Joel José Da Silva De Goes doño di Goisco y Enrique Ribeiro, doño di Centrum
Supermarket. Tur dos ta ex -miembro di e directiva di e asociacion di supermercado SUVECU.
E noticia aki a wordo anuncia oficialmente ayera pa e autoridad di supervision. Cada doño a haña un multa di 25.000 florin Caribense. Dia 25 di juli 2022, FTAC a manda un peticion di informacion na SUVECU den e marco di supervision di e cumplimento di e Ordenansa Teritorial riba competencia. E pedido aki tabata enfoca riba informacion tocante e asociacion i e operacion interno di e asociacion. Ademas, a haci preguntanan na SUVECU pa haña informacion tocante e structura di mercado y e relacionnan di competencia den e sector di alimento.
Maske cu a manda cartanan di recordatorio y a haci intentonan di contacto na varios ocasion, SUVECU no a percura pa duna tur e informacion cu FTAC a pidi nan durante un periodo largo. Te cu awor, e dos homber nan a ser invita na varios ocasion pa un entrevista, y toch nan a nenga di duna informacion. P’esei, e organo di supervision a dicidi di impone un multa administrativo na tur dos doño, manera menciona den un comunicado di prensa.