Segun ex minister di Cultura e rapport di SQS riba funcionamento di Departamento di Cultura (DCA) no a “keda scondi.” E ta un rapport traha pa duna e Minister di Cultura un bista amplio y profesional di kico realmente tabata pasando na DCA y pa trece solucionnan riba e puntonan.
Segun ex minister di cultura basa riba e rapport aki a cuminsa tuma e decisionnan necesario pa por cuminsa mehora locual pa hopi aña no tabata bay bon na DCA desde su comienso ora a bin cambio di Instituto di Cultura pa Departamento di Cultura, mas di 45 aña pasa.
Pasonan a wordo tuma y hopi mas mester pasa pa asina DCA por bay sostene e industria creativo di Aruba, como parti di e 6 sectornan prometedor pa diversifica Aruba su economia manera splica den e rapport “A strong and resilient economy 2019-2022.”
Ex minister di cultura Xiomara Maduro ta spera cu Mike Eman como e Minister di Cultura nobo di Aruba, por sigui traha cu e mesun pasion cu a haci esaki pa cultura di Aruba. E investigacion pa mehoracion na DCA ta haci caba, awo Eman por sigui haci e cambionan necesario na bienestar di Aruba su Cultura y e sector creativo di Aruba.
