E falta di control y handhaving riba e mercado informal a yega na un punto cu vendors- y comerciantenan legal no por competi mas. Esaki ta e preocupacion central cu a keda expresa unda a resalta cu e competencia desleal aki ta forsa negoshinan local pa enfrenta e decision dificil entre cera nan porta of opera pafo di e marcanan legal, Asina presidenmte di Comerciantenan Uni CUA a duna di conoce
Durante e declaracion aki, a subraya e importancia fundamental di paga impuesto (belasting) den un sociedad. Mientras cu e ciudadano y comerciante ta paga impuesto cu ta spera di haya servicio di gobierno bek,manera infrastructura, salud publico, hospital y pension,e ultimo 10 añanan e tema di e mercado informal cu no ta paga belasting a bira un punto di “absurdidez.”
Comerciantenan den desesperacion
E gremionan comercial ta ricibi constantemente keho di nan miembronan cu no por competi mas den nan mesun sector. Negoshinan formal cu ta registra na Belastingdienst y cu ta paga nan BBO debidamente ta enfrenta clientenan cu ta reclama cu nan prijs di producto of servicio ta demasiado caro, mientras cu e competidonan no ta registra ni ta paga e impuestonan aki.
E situacion a yega na un extremo tal cu varios comerciante a haci fraudemelding y a entrega keho oficialmente na departamentonan manera Economische Zaken y Belastingdienst. Sinembargo, apesar di tin prueba di e kehonan aki, nada no ta pasa y no tin accion di handhaving visibel.
E dilema pa e comerciante legal
E falta di intervencion di autoridad competente ta pone e gremionan den un posicion comprometido y hopi dificil pa conseha e comerciantenan cu ta yora pa ayudo. E pregunta declarando cu ta keda den aire ta kico mester contesta un señora of comerciante cu tin un negoshi legal: “Keda legalmente, cera bo luga, of bay bira ilegal tambe?”
E yamada ta keda dirigi na e minister y autoridadnan concerni pa tuma paso concreto y efectivo pa frena e mercado informal y proteha e negoshinan cu si ta cumpli cu e leynan di e pais.