Presidente di Federacion di Trahadonan di Aruba (FTA), Hose (Jomar) Figaroa, a duna un splicacion debido y profundo riba e situacion di e mercado laboral na Aruba. Figaroa a aclaria cu e medidanan pa legalisa personanan cu ta biba ilegalmente na e pais no ta soluciona e escasez di trahado, ya cu esaki simplemente ta transforma puestonan cu tabata ocupa caba.
Segun Figaroa, e legalisacion aki tin un efecto marginal riba e mercado laboral pasobra e no ta yenando e cuponan bashi. “Bo no ta yenando cuponan cu ta bashi, bo ta legalisando cuponan cu tabata ocupa caba, haciendo un luga ilegal bira legal,” e dirigente sindical a splica Por lo tanto, e escasez structural di man di obra ta keda un problema primordial.
E sindicato a bin ta papia cu varios gobierno den transcurso di tempo pa bin cu un maneho di admision hopi mas structura. Figaroa ta enfatisa cu e cantidad di trahado local na e momentonan aki no ta basta pa cubri e demanda actual, y mucho menos esun di futuro. Pa e motibo aki, e ta considera imperativo pa implementa un maneho organisa pa importacion di trahado.
E demanda aki lo bay aumenta debi na dos factor clave:
- Crecemento hotelero: Tin un cantidad grandi di cambernan di hotel cu tin permiso aproba caba of cu ta den pleno construccion. Ora e proyectonan aki keda cla, lo bay tin mester di hopi mas hende pa ocupa e puestonan nobo ey.
- Envehecimento di poblacion: Aruba ta enfrenta un envehecimento acelera di su poblacion. Den e proximo 10 pa 20 añanan, un cantidad significante di trahado lo drenta e edad di pension y lo sali for di e mercado laboral activo.
Un di e datonan mas preocupante cu e presidente di FTA a comparti, basa riba cifranan internacional, ta e asina yama replacement value (e balor di reemplaso pa mantene e poblacion stabiel). Pa un pais mantene su nivel di poblacion, e nivel mester ta na 2.1 yiu pa cada muhe. Actualmente, Aruba ta registra un cifra hopi mas abou, di apenas 1.4 yiu pa cada muhe, loke ta nifica cu e poblacion ta bahando.
Dado e realidad demografico aki, unda e grupo cu ta bay cu pension ta mas grandi cu e cantidad di hoben cu ta drenta e mercado di trabou, e unico alternativa real pa sostene e economia ta e importacion di trahado. Unico manera cu bo por bay cumpli cu e demanda di bo mercado laboral ta door di importacion di trahado, pasobra nos no tin un otro sistema pa haci’e,” Figaroa a conclui, lansando un yamada pa actua proactivamente prome cu e situacion empeora un biaha mas.