ORANJESTAD, Aruba
Informe a drenta cu na Corsou lo tin un crucero ancra cu hendenan infecta cu e coronavirus, esaki a crea un tipo di panico den comunidad aki na Aruba y mescos cu tur otro pais rond mundo, e impacto di e virus aki ta grandi.
Sinembargo Aruba no ta conta ainda c’un caso di un persona infecta cu coronavirus y Minister di Salud, sr Dangui Oduber a pidi tur hende pa sigui instruccionnan di instancianan indica, con tin cu actua na e momentonan aki.
Prevencion tanto aki na Aruba y rond mundo pa algun dia caba, ta e campaña mas grandi cu tin caminda principalmente labamento di man na tur momento, ta un di e miho formanan pa evita di wordo contagia.
Sinembargo den ultimo dianan aki, por bisa for di fin di siman biniendo Aruba y for di momento cu a bira conoci cu e virus a yega Hulanda tambe, hopi hende a cuminsa cumpra lo necesario pa proteha nan mes den cualkier eventualidad.
‘Handsanitizer’ rond mundo na e momentonan aki, a bira e producto mas cumpra y den cierto paisnan ya caba e producto aki a wordo bari for di tiendanan ya cu nan ta bay manera pan cayente.
Na varios pais tambe esaki a trece cune cu direpiente prijs di e producto aki a aumenta y lamentablemente por a ripara cu aki na Aruba tambe e handsanitizer aki a subi di prijs di un dia pa otro.
No ta cuestion di un aumento di 10 of 25 cen of 50 cen, pero den algun caso nos ta papia di aumento di 200% cu ta un aumento di riba 4 florin y den algun caso ainda mas.
Tin companianan cu ta importa handsanitizer cu den ultimo dianan a bende tur nan stock na doño di supermercadonan cu asina a crea un tipo di monopolio cu realmente ta inhusto.
Ta tristo cu e aumento di prijs aki ta pone cu tin hendenan di poco recurso cu no por cumpra e producto aki y sigur den un periodo caminda ya caba placa no ta yega pa productonan di prome necesidad.
Cu e coronavirus handsanitizer y e mask ta birando un producto di prome necesidad pero di otro banda comercio ta pone cu e ciudadano no por yega na dje.
Otro producto cu den ultimo cinco dianan a conoce un aumenta barbaro y hasta abusivo, ta e masknan cu ta wordo usa pa hopi hende rond mundo pa evita contagia nan mes pa medio di aire y den algun caso e abuso di prijs ta realmente espantoso.
Un mask cu antes tabata keda hopi dia riba reki pa dos te cu tres florin, awor ta costa na algun negoshi e contundente prijs di 12 florin, of mas, y ta spera cu e prijs aki lo sigui aumenta y ta otro abuso cu departamento di gobierno tin cu controla y pone un fin na e tipo di abuso aki mas pronto posibel. Corona virus ta un situacion cu mundo ta enfrentando y ta keda na cada uin di nos pone nos aporte y combati e crisis aki cu tin.
