Pueblo di Kòrsou a reakshoná masalmente riba e yamada di Kousa Promé. Den un kurá di sede yen yen na Duminguitu Papaya weg 14 dr. René Rosalia líder polítiko di Kousa Promé a duna un análisis detayá di e Onderlinge Regeling “ ku gobièrnu Pisas a firma dia 4 di aprel último ku e kolonisadó Hulanda.
Rosalia a splika ta dikon Kousa Promé ta bisa ku Hulanda a hera michi kue mèmè. Hulanda tin un deseo polítiko, ekonómiko ferviente. Esei ta introdusí algún medida, invershon, reforma, programa i proyekto riba Kòrsou. E akshonnan aki mester yuda krea aki na Kòrsou un infrastruktura ideal pa e polítika ekonómiko i komersial di Hulanda den Caribe i Latino Amerika. Den e Onderlinge Regeling Hulanda ta kumbiní ku e lo finansiá e reformanan aki for di su propio presupuesto. Hulanda mester di e teritorio di Kòrsou komo trampolín stratégiko, ekonómiko, komersial i militar. E medida, proyekto i reformanan aki ta den e afamado “landspakket Curaçao”. Hulanda a splika esaki for di 1995 den e rapòrt yamá “Oplegnotitie”. Den e rapòrt aki tin pará ku tur gabinete nobo ku sinta na Hulanda mester respetá”Oplegnotitie” i sigui implementé.
Ora e pandemia “covid-19” a dal aden i Kòrsou a kai den problema, Hulanda na un manera traishonero a probechá imponé “landspakket Curaçao” mediante CHE. Despues Hulanda a presentá e mésun “landspakket Curaçao” aki den un bachi nobo yamá COHO.
Ora ku COHO tambe a faya el a imponé e mésun “landspakket Curaçao” den Onderlinge Regeling deklarando ku COHO ta kaduká pero “landspakket Curaçao” si nunka. COHO mester keda intakto. Dicho echo e mésun “landspakket Curaçao” ku tabata den CHE i den COHO t’ei presente intakto den e Onderlinge Regeling nobo.
Ta p’esei Kousa Promé a deklará ku Hulanda a hera michi, kue mèmè.
Kousa Promé ta opiná ku Kòrsou mester respetá su mes, respetá su konosementu, honor i kapasidat pa traha su propio “landspakket Curacao” pa hasi Kòrsou i e yu-di-Kòrsou prospero i felis. Hamas nos mester ofresé nos mes komo trampolín pe komersio hulandes. Un país kolonisadó hamas t’ei pa su kolonia. E t’ei pa su mes benefisio.
