“Hopi impresionante”, tabata e prome reaccion di Minister mr. Wendrick Cicilia, despues di atende un bishita oficial dialuna atardi na Secrets Baby Beach Aruba. E tabata compaña pa dos miembro di Parlamento di Aruba, Stephany Sevinger, Otami Thomasia y algun consehero. E delegacion a topa cu e director general di e hotel, Alejandro Murcia, e gerente general Jose Maria Perez de Ureta y e gerente di finansa Fernando Vega.
Ehecutivonan di e hotel a conta e mandatario cu e hotel ta mas di 99% cla. Ta un inversion di alrededor di 160 miyon Dollar Mericano, cu ta emplea 430 trahado y cu ora e proyecto ta cla, lo tin 900 camber, parti den diferente categoria, for di pool-view, ocean-view, Master Suites te na e Presidential Suite.
Ta habri otro siman
Manera tur trabou ta cabando e siman aki, ya caba empleadonan a cuminsa keda den e hotel pa test tur facilidad y atraccion, pa sigura cu tur cos ta traha bon. Dia 5 di juni proximo lo ricibi e prome huespednan. Siendo un parti di e cadena Hyatt, e reservacionnan ta masha halto mes, segun gerencia di e hotel a anuncia na e mandatario.
Porfin pariba di brug
“Siendo un persona cu a lanta como mucha na San Nicolas y awendia biba na Pos Chikito, e hotel aki ta yena mi di orguyo. Pariba di brug por ta orguyoso di un hotel masha luhoso, moderno, cu facilidadnan impresionante y cu bista panoramico riba henter e horizonte di Baby Beach. Mi ta convenci cu e hotel lo traduci den un berdadero boost pa San Nicolaas”, tabata palabranan di Minister mr. Wendrick Cicilia.
Calidad riba cantidad
E Minister di Turismo y Labor ta kere den opcionnan nobo pa halsa e producto turistico di Aruba. Cu cambio di gobernacion, e vision nobo no ta pa sigui enfoca riba cantidad sino mas bien un balansa den desaroyo y medio ambiente cu bista riba conservacion di naturalesa. Door di habri un opcion nobo pariba di brug, no solamente ta expone e otro banda di nos isla na un miho desaroyo economico, sino tambe ta drecha calidad di bida di e trahadonan di pariba di brug mes. Pa comercio tambe un desaroyo asina ta crea un bon impulso, cu den pasado no tabatin.
Reforestacion
Un punto cu el a keda masha contento cu ne ta e intencion di e desaroyador hotelero pa traha riba e vision di gobierno pa planta mas mata posibel na Aruba, conoci como reforestacion. Grupo Martinon ta comprometi pa aporta na naturalesa y medio ambiente door di planta mata no solamente riba tereno di e hotel, sino na mas parti di nos isla, specialmente pariba di brug.
Reforestacion ta e practica di restora mondi cu tabata existi anteriormente cu nan a destruí of daña. E destruccion di mondi anterior por a sosode pa medio di deforestacion, cortamento di mata of candela di mondi. Tres proposito importante di programanan di reforestacion ta pa consecha mata, pa mitigacion di cambio di clima y pa proppsitonan di restauracion di ecosistema y habitat. Un metodo di reforestacion ta pa establece plantacion di mata.
Exito
“Mi ta desea e ekipo completo di Secrets Baby Beach Aruba hopi exito cu e apertura otro siman. Danki pa kere den e potencial di Aruba, di nos naturalesa y di nos hendenan”, asina Minister Cicilia a termina bisando.
