Minister di Educacion, Cultura, Hubentud y Deporte (ECYS), Melissa D. Gumbs, a tuma tempo pa duna claridad riba rumornan cu varios scol no a wordo informa tocante e clausura pendiente di nan gimnasionan. Den un comunicado di prensa djaweeps anochi, Gumbs a duna contestacion tocante e motibo di e clausuranan y e esfuersonan di parti di National Recovery Programme Bureau (NRPB) pa comunica cu tur involucra.
“Pa algun luna caba, mi a papia tocante e proyectonan andando bou di e Fondo di Fiansa (Trust Fund) cu ta relaciona cu ECYS,” Gumbs a declara. “ERP-1, bou di cua e reparacion di gimnasio di scol y facilidadnan deportivo ta cai, ta actualmente den e fase di mobilisacion y preparacion. Segun e rekisitonan contractual bou di e Trust Fund, posesion di tereno ta wordo entrega na e contratista (den e caso aki, Windward Roads) un bes cu acuerdonan wordo firma y mobilisacion cuminsa.”
Gumbs a indica cu esaki tabata parti di e comunicacion di NRPB cu publico durante tur proyecto di construccion y reparacion relaciona cu e Trust Fund. For di bishita na sitio, sesionnan comunitario, comunicacion directo cu scolnan, y contacto continuo cu stakeholders relevante, splicacionnan cla a wordo duna tocante e necesidad di restringe acceso un bes cu e contractnan ta na rudia.
“Tin varios motibo pa esaki, principalmente e siguridad di e personanan y edificionan den cercania di e trabounan,” Gumbs a continua. “E contratista no por risicá ningun accidente, daño na areanan repará of peor ainda, daño adicional cu ta deteriora integridad di e structuranan mas ainda.”
ERP-1 ta forma parti di e esfuerso di recuperacion despues di horcan Irma y inicialmente tabatin como meta pa repará klas y gimnasio na cuminsamentu di e Trust Fund. Sin embargo, prioridad a cambia pa klas y reparacion directo di scol, ya cu e administracion e tempo ey tabata prefera di garantisá un ambiente di sinja sigur despues di destruccion di e horcan. Pesey a separá y demorá e reparacion di gimnasio y deporte. Den e ultimo aña y mei, Ministerio di ECYS a traha duro cu NRPB pa move e proyectonan aki dilanti, locual a resulta den comisionamento di e proceso di licitacion y entrega di sitio na Windward Roads.
“Maske ta lamentabel cu esfuersonan di comunicacion aparentemente tabatin algun fayo, nos mester corda cu e reparacionnan aki cu tabata warda pa hopi tempo ta tumando luga finalmente,” Gumbs a conclui. “Hopi di e facilidadnan aki no por a wordo usá debidamente pa varios aña, pesey ta crucial cu e proyectonan aki por ehecuta suave y eficiente.”
Gumbs a urgi scolnan pa ta creativo cu educacion fisico pa nan alumnonan y a anima publico pa sigui e actualisacionnan oficial di e Ministerio y NRPB riba e proyectonan di Trust Fund, en bes di confia riba rumor sin fundeshi.