Detenshonnan pa manehá bou di influensia di alkohòl
Den e wikènt ku a pasa, polis a detené dos(2) shofùr pa manehá bou di influensia di alkohòl.
Djárason 12 di ougùstùs, alrededor di 3 or di mardugá, a detené un hòmber di inisial F.G.R.d.R. di 32 aña di edat na Kaya Grandi. Un patruya a para e sospechoso despues ku a mir’é ta kore zeilu ku su skuter riba kaminda. Durante kòntròl, e no por a mustra un reibeweis ni dokumentunan di seguro. Ademas e no por a identifiká su mes. Debí na su komportashon di manehá, a hasi un tèst di supla kuné i a resultá ku el a konsumí mas alkohòl ku ta pèrmití pa lei. A detené i a bai warda di polis. E sospechoso despues di vários intento, a nenga pa hasi e análisis di rosea di e forma korekto. Debí ku e no tabata den kondishon pa duna un deklarashon, a hib’é JICN. Pa esaki e lo haña un prosèsferbal i lo konfiská su reibeweis.
Djárason 12 di ougùstùs, alrededor di 2.30 or di mardugá, a detené un hòmber di inisial G.F.v.B. di 20 aña di edat den ‘centrumgebied’. Un patruya a para e sospechoso pa kòntròl despues ku a mir’é ta manehá den direkshon prohibí. Durante kòntròl, e sospechoso tabata mustra diferente karakterístika di un persona ku ta bou di influensia di alkohòl. A hasi un tèst di supla kuné i a resultá ku el a konsumí mas alkohòl ku ta pèrmití pa lei. El a haña un prohibishon di manehá pa 5 ora i a haña but pa manehá den direkshon prohibí. Ademas e lo haña un prosèsferbal. A transportá e sospechoso pa warda di polis pa kontinuá ku e trámitenan korespondiente.
Kòntròl di tráfiko
Den oranan di mardugá di djárason 12 di ougùstùs, a tene kòntròl di tráfiko na vários sitio. A para i kontrolá diestres(13) vehíkulo. Durante e kòntròl di tráfiko a detené dos persona pa manehá bou di influensia di alkohòl i a duna nuebe(9) but.
E butnan tabata pa e siguiente violashonnan:
6x pa manehá sin reibeweis òf pa no por mustra esaki;
2x pa manehá sin seguro bálido;
1x pa manehá den direkshon prohibí.
Kòntròlnan di tráfiko ta kontinuá.
Aksidente entre skuter i outo
Djamars 11 di ougùstùs, alrededor di 4 or di atardi, ‘meldkamer’ sentral a risibí notifikashon tokante un aksidente entre un skuter i un outo na altura di Kaya Kanari i Kaya Thomas M. Marchena. Ambulans a transportá shofùr di e skuter pa hòspital pa tratamentu médiko. Konforme e maneho di ‘botsen is blazen’ a hasi tèst di supla ku shofùr di e outo i no tabatin indikashon tokante uso di alkohòl. Pa motibu di prioridat médiko no por a hasi tèst di supla ku shofùr di e skuter.
Detenshon despues di bringamentu riba kaya
Djamars 11 di ougùstùs, alrededor di 2.35 or di atardi, ‘meldkamer’ sentral a risibí notifikashon tokante un bringamentu entre dos persona riba Kaya Krabe. Na altura di e krusada ku Kaya Falkon, polis a topa ku diferente persona i a resultá ku dos dama tabata enbolbí den un bringamentu riba kaya. Un di e damanan a resultá heridá i a risibí tratamentu médiko serka personal di ambulans. Na e sitio, alrededor di 2.45 or di atardi, a detené e dama di inisial J.LW. di 41 aña di edat pa maltrato. Investigashon den e kaso ta kontinuá.
A topa ku supstansianan probablemente narkótiko durante kòntròl di tráfiko
Djamars 11 di ougùstùs, alrededor di 3.50 or di mardugá, polis a para un outo pa kòntròl rutinario riba Kaya Korona. Durante e kòntròl, agentenan a sinti un holó fuerte paresido na supstansianan narkótiko. Pa e motibu aki a hasi un kòntròl den kuadro di Lei di Opio BES. A topa ku un kantidat chikitu di supstansianan probablemente narkótiko i a konfiská esakinan. Tambe e shofùr a haña prohibishon pa manehá pa motibu ku ta sospechá ku e ta manehá bou di influensia di supstansianan narkótiko.
A topa ku supstansianan probablemente narkótiko durante kòntròl
Djamars 11 di ougùstùs, alrededor di 2 or di mardugá, ‘meldkamer’ sentral a risibí notifikashon tokante un hòmber ku tabata sòru pa intrankilidat na un establesimentu di hóreka riba Kaya Korona. Na e sitio polis a topa ku e hòmber na e sitio. Durante kòntròl a topa ku un kantidat chikitu di supstansianan probablemente narkótiko i a konfiská esakinan.
Kaso di tiroteo ku herido
Djaluna 10 di ougùstùs, alrededor di 10.45 or di anochi, ‘meldkamer’ sentral a risibí notifikashon tokante un kaso di tiroteo ku herido na Kaya Kuarta. Deskonosínan a pasa i lòs bala riba un kas. Despues, e sospechosonan a hui for di e sitio. Dos persona i un kachó a resultá heridá pa bala.
Ambulans a transportá ámbos víktima pa hòspital pa tratamentu médiko. E kachó a fayesé a konsekuensia di e heridanan.
Alrededor di 10.55 or di anochi, notifikashon a drenta tokante eksploshon i un outo na kandela riba Kaminda Lac. Na yegada di brantwer a resultá ku ta trata di un pikòp na kandela. Brantwer a paga e kandela.
Investigashon den ámbos kaso ta andando.
Kòntròl di velosidat riba Kaminda Tras di Montaña
Djaluna 10 di ougùstùs, alrededor di 12.50 or di mèrdia, polis a tene kòntròl di velosidat riba Kaminda Tras di Montaña. Durante e kòntròl, a kontrolá dies vehíkulo i dos shofùr a haña but pa surpasá e velosidat máksimo pèrmití.
Kuerpo Polisial Hulanda Karibense (KPCN) ta kòrda usuarionan di tráfiko pa tene nan mes na e velosidat ku ta pèrmití. Na Boneiru, alomenos si tin otro indikashon, ta pèrmití pa kualke vehíkulo di motor, kore ku un velosidat máksimo di 40 km/ora den ‘bebouwde kom’ i 60 km/ora pafó di esaki. Polis lo sigui tene kòntròl di velosidat pa seguridat di tur usuario di tráfiko.
Aksidente riba Bulevar Gobernador N. Debrot
Djabièrnè 7 di ougùstùs, alrededor di 12 or di mèrdia, ‘meldkamer’ sentral a risibí notifikashon tokante un aksidente entre dos outo riba Bulevar Gobernador N. Debrot. For di deklarashonnan a resultá ku un di e shofùrnan tabata ke pasa e otro vehíkulo, na momentu ku esaki tabata lora. Pa e motibu aki, e vehíkulonan a dal den otro. E shofùr ku tabata ke pasa e otro, no tin reibeweis i a haña but pa esaki. E otro shofùr a resultá heridá i personal di ambulans a dun’é tratamentu médiko na e sitio mes.
Ladronisia di skuter
Djabièrnè 7 di ougùstùs a drenta keho di ladronisia di un skuter, koló blanku ku pretu di e marka Sym modèl X-PRO MI, ku plachi di number MF-343. E skuter tabata stashoná dilanti di un kompleho di apartamentu riba Kaya P.N. Antonio Neuman. Ta investigando e kaso.