Parlamentario Endy Croes a trece padilanti su preocupacion tocante e gastonan di FFD y e maneho di mantencion di parkenan di deporte na Aruba. Segun e parlamentario, e situacion actual di e fundacion ta rekeri un investigacion urgente pa motibo di e forma con e recursonan ta wordo administra.
Historia di e protocol y traspaso di empleadonan
Segun Parlamentario Croes, na 2011, e Gobierno di AVP a firma un protocol cu Lotto pa traspasa tur e empleadonan di mantencion di Lotto pa FFD. E tempo ey, CBN (un instancia cu a tuma e contrato di Lotto) a exigi cu 23.5% di e contracto mester wordo uza pa hala e empleadonan pa FFD.
Gastonan di mantencion vs. subsidio
Parlamentario Croes a detaya cu:
• Na 2012, Gobierno a pidi un subsidio di 4 miyon florin pa FFD pa por cubri salarionan y proyectonan.
• Actualmente, Gobierno ta duna un averahe di 3 miyon florin pa aña na subsidio na FFD pa mantencion di 9 parke di deporte.
• Di e subsidio aki, 70% ta bay na salario di empleadonan y 5% na costo di mantencion (vastto kosten).
• Esaki ta laga un resto di mas o menos 450,000 florin pa aña pa mantencion di e 9 parkenan.
Critica riba e gastonan
Parlamentario Croes a compara e cifra aki cu e gastonan di biahe di e Minister concerni, kende a gasta 500,000 florin solamente na biahe. E ta considera cu esaki no ta realista ni husto, ya cu e suma disponibel pa mantencion di 9 parke ta hopi abao, mientras cu e gastonan di biahe ta hopi halto.
Parlamentario Croes ta urgi Parlamento pa haci investigacionnan cla y transparente riba e raportnan di FFD, y ta spera cu esaki por sosode hopi trempan pa asina por studia y debati e situacion aki. E ta enfatisa cu pa soluciona e problema, Gobierno mester di un maneho y un vision mas concreto y responsabel.