“E carta ta confirma cu loke Gabinete Wever-Croes 2 a haci ta bon”
Recientemente, CAft a dirigi un carta na Parlamento di Aruba unda ta urgi
Parlamento pa trata e Presupuesto 2025. Tambe eyden ta informa cu e rebaho di tarifa di
impuesto cu Gobierno kier duna ta legitimo, y tin fondo p’e. Cu esaki, CAft ta duna Gobierno
rason cu tin espacio financiero pa rebaha e tarifa di belasting pa asina 28 mil hende no paga
belasting mas riba nan entrada.
Carta CAft 3 feb
Prome Minister Evelyn Wever-Croes ta indica cu ayera 3 di februari, CAft a manda un carta
pa Parlamento di Aruba pa trata e presupuesto. E mandatario ta splica cu a manda e
presupuesto pa Parlamento di aña pasa caba, prome cu eleccion. Awor CAft a “trek aan de
bel”, mandando e carta indicando na Parlamento pa trata e presupuesto cu ta algo di suma
importancia. Tambe e carta di CAft ta indica riba e cambio di impuesto cu Gobierno a
introduci. Cu esey tin un efecto financiero substancial pero cu Gobierno tin afdoende
financiele ruimte, suficiente espacio financiero pa rebaha e impuesto.
A crea espacio financiero
Gobierno a crea espacio financiero cu BBO na frontera y a dicidi cu e placa aki lo duna bek na
e pueblo door di reduci e belasting riba nan salario. Cu esaki 28 mil hende no ta paga
belasting mas y 12 mil hende cu si ta sigui paga, tambe ta haya un reduccion di entre 3 pa 4
mil pa aña. Un decisicion cu Gobierno a tuma den beneficio di e pueblo di Aruba. No
obstante, algun oponente a cuminsa critica y ataca e decision aki pero tampoco niun a bisa di
draai e bek paso nan sa cu e ta den beneficio di e pueblo.
Riesgonan sin presupuesto
Prome Minister ta sigui bisa cu e carta cu CAft a manda pa Parlamento ta wordo hopi comenta
na e momento aki, pero mester lesa e carta bon. Si no pasa e presupuesto 2025, tin hopi riesgo
pa Aruba. Riesgo pa paga debe entre otro y no ta bon pa pais Aruba no tin un presupuesto. E
mandatario ta di acuerdo cu Caft riba esaki mencionando cu tambe di su parti e lo haci tur
esfuerso pa e presupuesto wordo trata mas lihe posibel, y prome cu 31 di maart 2025 manera
indica den e carta di CAft.
CAft: Cambio di impuesto ta legitimo
Tambe CAft ta indica cu e cambio di impuesto aki ta legitimo den e cuadro actual di ley. Loke
CAft ta bisa tambe ta cu posiblemente (“mogelijke”) tin un buraco den e ley (“leemte”) y ta
pidi Parlamento pa tapa e buraco ey.
“E carta di CAft ta sostene e posicion di Gabinete Wever-Croes 2, cu nos decision di yuda 28
mil cuidadano pa nan tin mas placa den nan man, ta legitimo y tin placa p’e. E carta tambe ta
pidi atencion pa un problema serio y esey ta cu CAft kier pa e presupuesto 2025 wordo trata y
cu e rebaho di impuesto ta den e cuadro di ley existente y tin espacio financiero p’e. Esaki ta
un sosten pa colega Minister Xiomara Maduro cu a haci un trabou excelente y duro pa crea e
espacio financiero pa nos por duna bek na comunidad. Esnan cu kier critica, lesa e carta di
CAft hopi bon y compronde cu e carta ta confirma cu loke nos a haci ta bon” Prome Minister
a expresa.
