Recientemente, Minister di Husticia, Integracion, Transporte Publico y Energia, mr. drs. Arthur Dowers, acompaña pa su ekipo legal, a atende un presentacion na Utilities Aruba N.V. relaciona cu recomendacionnan pa actualisa y fortifica e statuutnan di empresanan estatal di utilidad.
Durante e encuentro, mr. dr. Aubrich Bakhuis, director di Themis Institute for Governance and Leadership, hunto cu Prof. dr. Frank Kunneman, co fundado di Themis Institute, a presenta un serie di recomendacion strategico enfoca riba mehora e cuadra di maneho di e entidadnan estatal. E recomendacionnan ta dirigi riba fortifica tanto e rol y responsabilidad di e Hunta di Comisario como e posicion y autoridad di e accionistanan.
Themis Institute for Governance and Leadership ta un instituto academico y profesional specialisa den maneho, liderato, derecho constitucional y desaroyo institucional. E instituto ta conta cu expertonan reconoci, incluyendo huristanan, academiconan y specialista den maneho corporativo, cu regularmente ta contribui na formulacion di maneho publico y reforma institucional den Reino Hulandes y region di Caribe.
Minister Dowers, den su capacidad como representante di Gobierno como accionista mayoritario di e empresanan di utilidad, a haya un splicacion amplio di e cambionan proponi. E recomendacionnan tin como obhetivo promove transparencia, responsabilidad y efectividad den e maneho di e entidadnan estatal, garantisando cu nan ta sigui sirbi interes publico di manera responsabel y sostenibel.
Minister Dowers a expresa su aprecio pa e aporte di Themis Institute y a enfatisa e importancia pa fortalece nos empresanan estatal, considerando cu nan tin un rol crucial den e desaroyo economico y bienestar di Aruba.
