Educacion ta e wes’i lomba di cualkier nacion. E maestronan ta carga e responsabilidad di forma nos mucha- y hobennan, nos futuro lidernan y e consenshi di nos comunidad. Pero na Aruba, e mesun hendenan cu ta forma e fundeshi di nos progreso, ainda ta warda riba husticia den forma di un sistema husto y restructuracion salarial. E wardamento aki no ta cuestion di asunto financiero, sino di fracaso moral y politico.
Un bataya cu no a cuminsa ayera
“E proceso di restructuracion salarial pa nos maestronan no a cuminsa na 2024 of 2025. Esaki ta un lucha cu a inica for di 2023, hunto cu SIMAR, Departamento di Enseñansa y DUO’s. E meta tabata cla; alinea e salarionan di e maestronan cu standard moderno, reconocemento di nan responsabilidad y segura equidad compara cu otro profesionalnan den sector publico”, Eduard a indica. Pero a pesar di tur esfuerso, e proceso a stagna. E maestronan awor a tuma iniciativa pa sinta cu e minister en cuestion, paso e urgencia a bira inaceptabel. No ta cuestion di politica, ta cuestoin di respeta e profesion aki, cu ta tene nos klasnan na bida y ta duna enseñansa na nos muchanan.
Un mocion sin sosten
Eduard Pieters a enfatisa cu: “Durante Tratamento di Presupuesto riba 28 di maart ultimo, PPA a trece un mocion dilanti, pa urgi Gobierno pa entre otro pa e aña aki ainda, haci algo cu e restructuracion salarial aki. Den e mocion tin para, cu pa den 2025 presenta y aproba un structura salarial nobo pa nos maestronan conforme e diferente consehonan traha durante e ultimo añanan”. Pero lamentablemente e mayoria den Parlamento, incluso e propio maestronan cu awor tin e funcion di Parlamentario, a vota contra e mocion di PPA. Pues si e maestronan dentro di Parlamento no por para cu nan coleganan den veld, unda otro e maestronan lo por bay pa sosten? Segun Eduard Pieters, fraccion di PPA ta para firme den e proceso aki, pasobra nan ta reconoce e balor di maestro, mientras cu otro ta scoge pa keda keto en bes di ta solidario.
Cuestion di prioridad
Eduard Pieters ta di opinion cu e asunto aki no ta djis tocante salario. E ta tocante balora educacion como un prioridad nacional. Sin maestro motiva, balora y compensa hustamente, nos ta pone na risico e calidad di henter nos sistema di educacion. E paisnan den region ya ta invertiendo den nan maestronan, reconoceniendo nan como e yabi clave pa crecemento sostenibel. Aruba ya ta kedando atras y no mester sigui perde mas tempo.
Pa conclui Eduard Pieters a expresa cu e tempo pa bin cu excusa a pasa. E maestronan merece mas cu djis un promesa. Nan merece accion y resultado. Fraccion di PPA lo sigui vigila di cerca e proceso di restructuracion salarial, no como un fabor, pero como un derecho. PPA lo sigui boga pa pone educacion prome na Parlamento, gobierno y comunidad, pa duna nos maestronan e respet cu nan merece y e salarionan cu ta refleha nan rol indispensabel. Paso si nos inverti den nos maestronan, nos ta inverti den futuro di Aruba.