Durante conferencia di prensa, lider di fraccion di PPA, Otmar Oduber, a subraya cu Aruba ta confrontando un desaster ambiental cu mester haya atencion urgente. E preocupacion di partido PPA ta bon funda, ya cu e problema di mal maneho di desperdicio, mal maneho di dump y boicot politico contra solucion real, ta un atake directo riba salud di nos hendenan. PPA ta pone e asunto di maneho di desperdicio atrobe riba mesa: bida y salud di hende ta na peliger y e maldad cu a sosode den e ultimo añanan mester sali na luz.
Mal maneho di ex minister Arends
E raiz di problema ta conecta cu mal maneho di ex-minister Ursell Arends. P’esey mes fraccion di PPA ta pidi un Reunion Publico urgente pa discuti e iresponsabilidad di un ex-minister cu, aunke awe e no ta den funcion mas, pero si e ta activo politicamente. “El a boycott un proyecto vital di incinerator, djis pa capricho y show politico di cera dump. E tempo ey DOW mes a duna conseho pa instala dos incinerator, mirando e cantidad alarmante di sushi y desperdicio cu nos ta produci. Nos tur sa cu tin mas di 50 container yena cu material humano y medico, pero ainda no a trata cu nan. Incluso dos siman pasa, minister Herde mes a confirma den Parlamento, cu tur loke ami ta bisando no ta un storia inventa,” Otmar a indica.
7 aña perdi y sin vision
Segun Otmar Oduber: “Si nos a sigui e vision di instala incinerator siete aña pasa, Aruba no ta den e situacion alarmante di maneho di desperdicio cu tin awe. Imagina bo, cu AWSS mester a busca no dos, sino cuater incinerator, cu ta un paso positivo cu PPA ta aplaudi, pero nos ta siete aña laat. Entre tanto, pueblo ta paga cu su salud. E desaster na Ser’i Tijshi, caminda gas ta sali y ta afecta bisindario, ta un crimen ambiental cu no por keda sin tin consecuencia.”
Storia di bancarota ta un fabula
Otmar Oduber ta exigi pa e minister bin cu e rapport forensico y esun di KPMG, cu ta existi for di 2020/2021, pero nunca a mira luz di dia. Den e mesun tempo ey, ex-minister Arends a indica cu Serlimar tabata bayendo den bancarota. “Pero realidad ta otro, si compara Serlimar cu Aruba Post y Arubus, Serlimar nunca tabata realmente bancarota. E “storia di Serlimar ta bancarota” tabata un fabula pa boicotea un sistema nacional y prepara un entrega na e interesnan priva”, el a subraya.
Ley di Serlimar pa cobra tin 7 aña warda den lachi
Segun Otmar Oduber tin evidencia cu ta e minister anterior kier a kita tur derecho di Serlimar su existencia, door di no pasa e ley pa Serlimar por cobra comunidad pa su servicionan. E ley aki ta relevante y mester mira luz di dia. “E ta den di dos ronde na Parlamento, unda djis mester vota. Pero tur hende ta keto. Si implementa e ley aki, Serlimar por cobra pa su servicio, para riba su propio pia y hasta genera ganashi. Pero kico ta loke kier a haci cu Serlimar? Gobierno cu ta subsidia nan, ta pone nan haci un gasto di 25 miyon florin y ta duna subsidio di 20 miyon florin, condenando Serlimar pa keda den situacion financiero precario”.
Esaki no ta solamente un eror administrativo, sino un boicot di salud contra nos pueblo. E plan di ex-minister tabata cla: pone Serlimar bati bancarota, pa despues duna Serlimar na un compania priva. E deal bou di mesa tabata cla caba.
P’esey mes PPA ta pidi un Reunion Publico cu e minister pa haya transparencia y saca e documentonan di 2020/2021, pa pueblo y Parlamento por mira e realidad di maneho di desperdicio. Ningun minister no por keda libra di su iresponsabilidad, specialmente despues di a boicotea un sistema vital y pone salud di henter comunidad na peliger.