Ta cu gran indignacion nos mester tuma nota cu Minister Gerlien Croes ta “back track” riba e acuerdo cu e mes a tuma den 2022 durante e Inter Parlamentario Reunion di Reino, IPKO. Durante e reunionnan aki a wordo stipula bon cla cu e gobiernonan mester garantisa cu semper tin consensus di e parlamentonan ora ta trata di leynan di consensus, tanto den e proceso di traha e ley como durante e proceso cu ta sigui despues. Transparencia cu e parlamentonan no ta un opcion, ta un obligacion.
E proceso di crea e ley di HOFA a cana full contrario na e palabracionnan aki. E ultimo briefing pa Parlamento a tuma luga dia 4 di juli 2025. Durante e reunion aki a informa Parlamento cu e negociacionan na nivel di ambtenaar a finalisa, y cu lo cuminsa cu negociacionan na nivel di gobierno. Y cu gobierno lo informa Parlamento prome cu tuma decision. E compromiso aki no a wordo cumpli. Pa sorpresa di tur hende, e concepto a wordu aproba, presenta na Conseho di Ministro di Reino, y e Conseho di Ministro di Reino ya a duna su aprobacion dia 29 di augustus 2025.
Loke ta mas grave ta cu Minister Gerlien Croes, e minister di Reino, a forma parti di e delegacion cu a sera e acuerdo na IPKO na 2022. E tabata conoce e palabracionnan bon cla. No obstante, e la dicidi di no sigui e acuerdo. Esaki no ta simplemente un eror administrativo; e ta un violacion di confiansa, un atake riba e rol di parlamentario y un señal di iresponsabilidad politico.
E minister no por pretende cu nada a pasa. Su accion ta mina e fundeshi di transparencia y colaboracion den Reino y ta manda un señal cu acuerdonan den Reino no ta obligatorio si e no ta cumbini. Minister Gerlien Croes a perde su credibilidad. Parlamentarionan y ciudadanonan no por confi’e mas asina. El a “back track” riba e acuerdonan y esaki ta un berguensa politico grandi cu no por keda sin consecuencia.
Ta ora pa tuma responsabilidad politico. Minister Gerlien Croes mester duna cuenta di su accion y reconoce cu e confiansa cu e tabata tin como minister a wordo totalmente daña. Parlamento merece respet, transparencia y pa cumpli cu acuerdo — no weganan politico.