Trahadornan publico den e asina yama ‘Rijksoverheid’ na Hulanda a drenta den un periodo di protesta y vaga formal despues cu e Gabinete a impone un ‘nullijn’ (linea di aumento cero), nificando cu no tin espacio pa subida di salario apesar di e inflacion halto cu ta afectando e pais.
Marieke Mansschot, representante di e directiva di e sindicato FNV Overheid cu ta e sindicato di mas grandi na Hulanda, a splica den un entrevista recien cu e situacion a bira insostenibel pa e trahadornan. Segun Mansschot, e decision di e Gabinete pa mantene e salarionan stanca ta nifica un kiebro directo den e forsa di compra (koopkracht) di e trahadornan, specialmente esnan den e posicionnan mas vulnerabel y crucial.
Inflacion vs. Forsa di Compra
E exigencia principal di e sindicato ta un aumento structural di 6%. Mansschot a enfatisa cu e peticion aki no ta un luho, sino un necesidad pa compensa e costo di bida cu a escala drasticamente na Hulanda.
“Tur cos ta bira mas caro. E hendenan aki mester por sigui paga pa nan comprasnan, nan hipoteca y nan huur. Si no, e trahadornan simplemente ta cay den problema financiero,” Mansschot a declara.
El a agrega cu hopi di e trahadornan afecta, manera e personal di limpieza (schoonmakers), no ta pertenece na e categoria di esnan cu ta gana e salarionan mas halto na Hulanda, locual ta haci e impacto di e ‘nullijn’ mas doloroso.
Escalacion di Accionnan
E prome fase di e protesta a cuminsa cu un vaga di tres dia, caminda e sectornan mas crucial, manera e personal di limpieza, a baha trabou. Mansschot a adverti cu esaki ta solamente e principio si e Gabinete no cambia su postura.
“E siguiente paso ta pa delibera cu nos cuadro y e ora ey nos lo sigui escala. Si ta necesario, nos no ta exclui accionnan mas grandi y un poco mas ‘desordo’,” e dirigente sindical a splica. Maske e sindicato tin tur boluntad di sinta na mesa pa negocia, nan ta insisti cu esaki mester sosode bou di e condicionnan corecto, algo cu te asina leu no a wordo ofreci pa e gobierno.
Gabinete ta Mantene Postura
E decision pa no duna aumento salarial tabata un medida cu tabata existi caba y cu e Gabinete nobo a dicidi di adopta y mantene y no haci cambio. Pa e trahadornan publico, esaki ta wordo bisto como un falta di baloracion pa e trabou esencial cu nan ta realisa pa e estado Hulandes.
Mientrastanto, e efecto di e vaga lo cuminsa wordo sinti den e departamentonan di ‘Rijksoverheid’ rond di e pais, miéntras cu FNV Overheid ta keda firme den nan lucha pa e 6% di aumento cu nan ta considera husto y necesario.
