Rotary Club Aruba a instala su directiva nobo pa
2024–25. E evento a tuma lugar na e edificio renoba di Maria Convent na Universidad di
Aruba. Presidente saliente Luis Oduber a hiba palabra un rato unda e la desea e Presidente
di aña Rotariano venidero tur clase di exito y gradici e miembronan y di e club cu a sa di
duna nan sosten pa asina Rotary Club Aruba por a sigui cu su aporte y sosten na diferente
fundacion riba nos isla.
E anochi a sigui cu instalacion di e directiva nobo bou di guia di Dr. Diego Acevedo, apunta
como e siguiente presidente di Rotary Club Aruba pa aña 2024 – 2025. Diego ta miembro di
Rotary Club Aruba desde 2017 y a fungi como miembro di directiva pa un paar di aña.
E otro miembronan di directiva a keda como lo siguiente: Rebecca Maduro (secretaria),
Robert Henriquez (tesorero), Luis Oduber (presidente saliente), Rubiela Lampe-Chiquito
(director di administracion di e club y vice presidente), Orlando Hoevertsz (director di
miembrecia y secretario elegi), Paul Arends (director di proyectonan comunitario), Joost
Lomans (director di Rotary Foundation) y Rishi Achaibersing (sergeant at arms).
Durante e anochi di instalacion, Diego a haci entrega tambe di reconocimento na Presidente
Saliente di Rotary Club Aruba Luis Oduber cu un Paul Harris award pin pa su tremendo
trabou durante e aña cu a pasa y asina termina su presidencia den un forma super ameno y
positivo. Tambe Diego a honra miembro Stanley Looman pa su dedicacion y compromiso pa
yuda nos comunidad.
Presidente Diego a hiba palabra reflehando ariba su trayectoria y con e magia di Rotary a
hib’e pa join Rotary Club Aruba, facilita pa un encuentro casual na un aeropuerto cu
Rotarian Barry Rassin, ex-Presidente di Rotary International. E magia di Rotary, esaki ta e
tema pa e aña aki. Presidente Diego a enfatisa ariba e magia di Rotary y e nificacion di crea
“serendipity”. E la sigui na elabora tres elemento esencial pa logra esaki; siendo curioso,
consciente y tumando accion claro semper teniendo na cuenta e “4-way test” di Rotary. Di e
cosnan cu nos ta bisa, pensa of haci, nos tin cu puntra nos mes e siguiente 4 preguntanan:
Prome: e ta e berdad? di dos: e ta husto pa tur esnan concerni? di tres: e lo yuda construi
bon boluntad y mihor amistad ? y di cuater: e lo ta beneficioso pa tur concerni?
Presidente Diego ta sumamente orguyoso di e impacto positivo cu e famia di Rotary tin den
nos comunidad. Rotaract Club Aruba y clubnan Interact Club Colegio Arubano, Interact Club
Aruba na de Schakel College y Interact Club na International School of Aruba a bin ta hasi
un tremendo trabao cu diferente proyecto nan.
Na final Presidente Diego kier a gradici tur esnan cu a haci e anochi di instalacion posibel.
