WILLEMSTAD,Curacao
Ayera nochi e sistema di radar di Wardakosta a detektá un kontakto sospechoso riba laman. E
boto tabata nabegá na un manera sospechoso direkshon di Kòrsou. Esaki tabata motibu pa e
Rescue and Coordination Center di Wardakosta manda un Metal Shark ku un tim di
Wardakosta i Milisia di Kòrsou na bordo pa bai na e lokalidat di e boto sospechoso. Na
momento ku a interseptá e boto a enkontrá 43 indokumentado na bordo. E grupo di
indokumentado tabata tin dos makaku tambe huntu ku nan. Tur e Venezolanonan indokumentá
ku a purba di drenta Kòrsou a ser entregá na Kuerpo Polisial di Kòrsou. E animalnan a ser
entregá na servisio veterinario i personal di GMN tambe tabata presente pa tèst e
indokumentadonan riba COVID-19.
Wardakosta ta sigui ku patruyanan intensivo pa vigilá i kuida e awanan marítimo di Aruba,
Kòrsou i Boneiru. Wardakosta ta ehekutá e trabounan akí ku asistensha di Defensa den Karibe
den forma di e barku di Marina Real Zr. Ms. Groningen i militarnan ku lo patruyá riba tera.
Wardakosta ta pidi yudansa di tur siudadano ku detektá kualke situashon sospechoso riba
laman of na kosta pa yama e number 913 di Wardakosta. Ku yudansa di siudadanon nos por
mantené e seguridad riba laman i nos kostanan.
