Cuerpo Policial di Aruba a confirma cu un turista di nacionalidad Mericano a fayece como consecuencia di un accidente fatal den trafico cu a pasa na Pos Abao na final di aña pasa, cu ta pone e total di morto den trafico pa aña 2025 na (11).
E accidente a pasa diasabra 27 di december 2025 pa mas o menos 8’or di anochi, ora Central di Polis a wordo notifica tocante un accidente serio riba caminda di Pos Abao. Un auto a dal dos dama peaton y despues a bandona e sitio di e accidente.
Patruya di polis y ambulance a wordo despacha inmediatamente. Na yegada, polis a topa dos muhe riba caminda cu herida grave. E auto cu a dalnan no tabata mas presente na e sitio.
Personal di ambulance a duna prome auxilio na e sitio y despues a transporta e dos victimanan, cu tabata turista di nacionalidad Mericano, pa Hospital Horacio Oduber (HOH cu maximo urgencia.
Specialista di trafico y polis tecnico a presenta pa haci investigacion. Un di e victimanan a wordo interna den ICU den condicion critico.
Diamars 13 di januari 2026, pa mas of menos 1’or di merdia, Cuerpo Policial a wordo notifica pa personal di hospital cu e un di e dama a fayece pa consecuencia di su heridanan. Dokter a constata morto di señora Lisa Marie Barnett, nacido 26 di oktober 1968, di 57 aña, di nacionalidad Mericano.
Como cu e accidente a pasa durante aña 2025, e caso aki ta wordo registra como e morto number (11) di trafico pa e aña.
Cuerpo Policial di Aruba ta manda su sincero condolencia na famia di e fayecido.
Autoridadnan ta haci un apelacion fuerte na tur hende cu por tin informacion of cu a presencia e accidente pa yama e tiplijn di polis na 11141. Bo por keda completamente anonimo.
Tambe ta haci un apelacion directo na e chauffeur cu a dal e dos dama y a huy for di e sitio di e accidente pa presenta na Warda di Polis y tuma responsabilidad pa su acto.