WILLEMSTAD, Curacao
Den e afan pa kompartí mas ku nos próhimo ta organisando un téletòn di emergensia titulá #MiTaDuna. Un yamada riba nos solidaridat nashonal na momentunan di emergensia mundial.
E téletòn ta un kampaña mediátiko ku ta rekoudá fondo spesialmente pa Fundashon Yudansa pa Kòrsou mihó konosí den komunidat komo ‘Voedselbank Curaçao’. Pa añanan kaba Voedselbank Curaçao a bini ta distribuí paketenan di kuminda tur luna pa e famianan ménos privilegiá den nos komunidat.
Durante e téletòn riba djasabra 2 di Mei, 2020 ta preparando un programa spesial pa skuchabo, kompañábo, i entretené bo den e momentu di krísis mundial COVID-19 (Coronavírùs). Lo pone énfasis riba diferente aspekto di e situashon ku nos ta aden.
E transmishon lo bai ta via diferente medio di komunikashon: nos kanalnan lokal, radionan i facebook.
Ban yuda ku nos donashon di kurason #MiTaDuna. Huntu lo duna e mucha-, hóben-, grandi- i famianan mas afektá durante di e periodo aki ku e aporte solidario nos por surpasá tur kos. Nos tur mester di otro, p’esei #MiTaDuna.
