Aruba ta atravesando un momento di “full empleo” y crecemento economico riba papel, pero tras di e cifranan ey tin un realidad cu nos no por sigui ignora. Como medio, nos ta observa cu preocupacion con e economia di nos isla, cu den principio mester ta un instrumento pa sirbi e bienestar di su pueblo, a bira un machine cu ta traha den sentido contrario. Awe, e prioridadnan nacional ta parce seriamente deforma: placa pa caha di Gobierno y ganashi pa inversionista a bira e unico nort di nos lidernan politico.
E Mito di Crecemento Sin Limite
Pa añanan largo, politiconan di tur color a gaba cu e cantidad di camber di hotel nobo y e recordnan di bishitante cu ta yega nos pier. Pero na kico nos ta sacrificando nos producto turistico? E expansion desenfrena aki ta baha e calidad di servicio y ta crea un presion insostenibel riba nos bida social y mercado laboral.
E necesidad pa yena e puestonan di trabou cu e hotelnan nobo aki ta genera, a hiba nos na un entrada masivo di trahadornan migrante, hopi biaha sin e screening debido. Esaki no solamente ta cambia e fibra social di nos comunidad, sino cu e ta core cu e bishitante fiel cu tabata bini Aruba pa e trato personal y e identidad unico di nos hendenan. Aruba ta birando ireconocibel den su propio mondi di concreto.
Un Isla Cu Su Spacio Ta Agota
Aruba no ta un continente; nos espacio ta limita. Sigui yena e beachnan, sigui permiti edificio tras di edificio y aumenta e cantidad di auto riba caya no ta un strategia di progreso, sino un receta pa asfixia social. E pregunta fundamental cu nos politiconan ta nenga di contesta ta: Pa ken nos ta construi? Pa ken nos ta goberna?
Si e argumento pa trece mas hende ta pa “salba” fondonan social, nos mester puntra nos mes si no tin otro caminda mas creativo y menos destructivo pa logra esaki. E vision di “mas hende ta igual na mas placa” ta un pensamento di corto plaso cu ta hunda nos futuro a largo plaso.
Conclusion
Un economia sano mester crece den harmonia cu su poblacion y mester garantisa un poder di compra husto pa e local cu ta traha duro tur dia. Ora cu ganashi y voto ta e unico lenguahe cu nos lidernan ta papia, e horea pa scucha e preocupacion di e ciudadano ta keda cera.
Ta ora pa un pausa den e careda loco aki. Ta ora pa pone e calidad di bida di e Arubiano prome cu e cantidad di camber di hotel. Si nos no haci esaki awor, pronto nos lo tin un isla yen di edificio, pero bashi di e alma cu a haci nos grandi.