Entidat Públiko Boneiru (EPB), representá pa diputado Pablo ‘James’ Kroon, a firma ku Selibon N.V. un akuerdo di ‘Maneho di shushi na midí’. Ta trata aki di un akuerdo ku ta konsistí di un total di 8 proyekto.
“Ya kaba Selibon N.V. a ranka sali ku ehekushon di mayoria di e proyekto nan”, Rudsel Leito, direktor di Selibon N.V. a bisa na momento ku e a firma e akuerdo. Entidat Públiko Boneiru (EPB) konhuntamente ku Ministerio di Infrastruktura i Maneho di Awa tin algun tempu kaba ta trahando riba e plan. E plan a keda aprobá i finansiá dor di Hulanda pa un montante di 2 mion dòler.
Diputado Kroon ta sumamente kontentu di por a firma e akuerdo pa nos mantené nos dushi isla Boneiru limpi i bunita. E ta gradesí Selibon N.V. i Rudsel Leito pa nan trabou inkansabel.
