Cu e yobida fuerte den fin di siman, Cruz Cora Aruba a mobilisa mesora pa asisti na casnan afecta pa awa. Via alarm central a drenta algun peticion pa yuda cu dak y tambe pa yuda saca awa for di varios cas. E disaster team di Cruz Cora mesora a haci un yamado na voluntarionan pa bin mesora y por cuminsa mobilisa y duna asistencia unda por.
Tambe mesora a tuma contacto cu De Palm Tours y ABC Tours cu semper ta colabora cu nan jeeps y chauffer pa asina por transporta e voluntarionan te unda nan mester yega. Cruz Cora Aruba ta hopi agradeci pa e sosten aki di e dos companianan aki, cu semper ta pendiente y mesora ta manda su jeeps.
Asina por a yuda drecha dak cu lona na varios cas, yuda saca awa y tambe por a sigui cu e trabou diario durante Covid-19, cu ta e Meals on Wheels, entregando e cumindanan cayente na tur esunan cu ta ricibi esaki tur dia.
Cruz Cora kier gradici ABC Tours, De Palm Tours y tur voluntario cu a colabora pa asina por a cumpli cu tur trabou!
