Den ultimo simannan tabatin un cantidad alarmante di acusacionnan serio contra miembronan di Cuerpo Policial di Sint Maarten, mencionando envolvimentonan den benta y tambe uzo di autonan confisca.
Minister di Husticia Anna E. Richardson a tuma nota di e acusacionnan serio, cu el a considera como acusacionnan potencialmente dañino y a haya necesario a cuminsa un investigacion independiente.
Den cuadro di esaki, dia 16 di November ultimo Minister Richardson a manda un carta pa Abogado General Roger Bos, pidiendo pa Recherche Nacional cuminsa un investigacion riba e acusacionnan cu tin contra e polisnan.
Riba diarason, 25 di November, e Minister a ricibi un reaccion riba su carta for di Abogado General Roger Bos, informando cu un bista preliminar riba e asuntonan aki door di oficina di PG no a descubri nada. Pero pa no keda duda den e tema serio aki y acusacionnan serio, lo sigui haci mas investigacion.
Cualkier persona cu por tin informacion riba e tema aki ta wordo pidi pa presenta y duna un declaracion y entrega documentonan relaciona cu esaki na oficina di Recherche Nacional.
E Minister ta bisa cu ta masha importante pa e acusacionnan aki keda regla mas lihe posibel pa tin confiansa completo den e forsa policial y esnan den posicion d autoridad, cerca e publico en general.
