Detenshonnan pa manehá bou di influensia
Djabièrnè 5 di mei, alrededor di 12.15 or di mardugá, ‘meldkamer’ sentral a risibí notifikashon tokante un aksidente riba Kaminda Lagun di kua un outo a resultá den roi. Na yegada di polis a hasi un tèst di supla ku e shofùr for di kua a resultá ku el a konsumí mas alkohòl ku ta permití. A detené e dama di inisial V.A.A. di 54 aña di edat pa manehá bou di influensia di alkohòl i a konfiská su reibeweis.
Djamars 29 di aprel, alrededor di 8.20 or di anochi, ‘meldkamer’ sentral a risibí notifikashon tokante un aksidente entre un bròmer i un skuter riba Bulevar Gobernador N. Debrot. E patruya a hasi un tèst di supla ku ámbos shofùr for di kua a resultá ku e shofùr di e skuter a konsumí mas alkohòl ku ta permití. A detené e dama di inisial M.J.B. di 35 aña di edat pa manehá bou di influensia di alkohòl i el a haña un prohibishon pa manehá di 4 ora. E shofùr di e bròmer a haña but pa manehá sin plachi di number i tayer gastá.
Diferente notifikashon pa asistensia durante Dia di Rincon
Kuerpo Polisial Hulanda Karibense(KPCN) ta wak bèk riba 30 di aprel, Dia di Rincon. den oranan di mainta i atardi tur kos a kana trankil. Sinembargo polis a konstatá ku stashoná tras di barikada i habri barikada sin outorisashon ta keda un problema kontinuo. Esaki por tin konsekuensia ku servisionan di emergensia no por pasa òf ku peatonnan ta na peliger. A yama hopi shofùr pa kita nan vehíkulo. Banda di esaki a drenta diferente notifikashon tokante personanan ku a bira malu di kua a pidi Krus Kòrá i Ambulans pa duna asistensia.
A kontrolá tur shofùr den e paradanan di simadan riba uzo di alkohòl ku un tèst di supla, tin un seguro bálido i un reibeweis bálido basá riba e kategoria di e vehíkulo ku ta manehá. Tur reibeweis tabata na òrdu i tur shofùr a pasa e tèst di supla riba konsumo di alkohòl ku éksito. A hasi e kòntròl riba konsumo di alkohòl en total tres biaha.
Den oranan di anochi, akshon di polis tabata nesesario pa motibu di violashonnan. Alrededor di 10.20 or di anochi a detené un dama di inisial F.M.I.F. di 34 aña di edat Kaminda La Union pa manehá bou di influensia di alkohòl. Pa motibunan deskonosí, e shofùr a pèrdè kòntròl riba su vehíkulo i a resultá den mondi. Konforme e maneho ‘botsen is blazen’ a hasi un tèst di supla kuné i a konsekuensia di e resultado di esaki a detené i a hib’é warda di polis pa un análisis di rosea. A konfiská reibeweis di e sospechoso.
Tambe ‘meldkamer’ sentral a risibí vários notifikashon tokante bringamentu entre presentenan. Alrededor di 9.45 or di anochi, un bringamentu a tuma lugá den bisendario di Kaya Apelsina. Aki a dal e víktima ku bòter di glas. El a haña tratamentu médiko serka personal di ambulans. No a topa ku e kontra partido. Mas lat, alrededor di 11.50 or di anochi, a detené un hòmber di inisial N.A.K. di 23 aña di edat i un hòmber di inisial N.L.R.C.T. di 25 aña di edat na Bulevar Miguel A. Pourier. E detenshon a tuma lugá despues ku a drenta notifikashon di un bringamentu na un establesimentu di hóreka na e kaya menshoná.
Finalmente, alrededor di 12 or di mardugá, a drenta otro notifikashon tokante un konflikto na altura di Kaya Commèrce ku tabata menasá di sali for di man. E konflikto a eskalá den un bringamentu entre un grupo di hende presente, di kua a hasi dos detenshon riba Kaya Para Mira. Ta trata di un hòmber di inisial A.A.R.C. di 24 aña di edat i un hòmber di inisial R.R.C.C. di 42 aña di edat. Ta investigando e kasonan.
Kuerpo Polisial Hulanda Karibense ta enfatisá e importansia pa kumpli ku e medidanan di seguridat. E reglanan aki tei pa garantisá e seguridat di un i tur. Den vários kaso por a prevení insidentenan dor di kumpli ku regla. KPCN ta gradisí e organisadónan di Dia di Rincon i e partnernan di kadena pa e bon koperashon durante di e dia i ta wak dilanti riba un siguiente edishon seif i éksitoso.
Insidente ku tiroteo
Djárason 30 di aprel, alrededor di 8 or di mainta, ‘meldkamer’ sentral a risibí notifikashon tokante un kaso di tiramentu ku a tuma lugá riba un kas na Kaya Den Haag. Den oranan di mardugá habitantenan a skucha tiru i mainta a konstatá ku a lòs bala for di un arma di kandela den direkshon di e kas. No tabatin herido. A konfiská tambe un outo na e sitio ku tabatin perforashon di bala. Investigashon den e kaso ta andando.
KPCN ta pidi tur persona ku a mira, tende òf tin informashon tokante e suseso aki pa tuma kontakto ku polis na 715 8000, 717 8000 òf via e liña di tep anónimo 9310.