Carta Habri for di Boneiro na Prome Minister di St Maarten Dr. Luc Mercelina. Nos a lesa bo condenacion fuerte y pasiona contra e comentario ofensivo y racista di miembro di parlamento Hulandes Thierry Baudet. Nos ta comenda bo curashi pa papia palabra cla contra e retorica colonial, manipulacion demografico, y e idea degradante cu Caribe ainda ta un region pa “repopulá” of explota.
Loke Sr Mercelina ta condena awor como un “fantasia colonial” pa Sint Maarten, ta e realidad doloroso cu Boneiro ta bibando desde 2010. E deklarashonan di Baudet no ta un menasa nobo—nan ta simplemente un expresion directamente di un direccion di politica cu ya a wordo realisa den silencio na Boneiro, cu consecuencianan devastador.
Desde e disolucion di Antia Hulandes y e aneksashon forsa di Boneiro como un “teritoriale openbaar lichaam” di Hulanda, nos a sufri: Un aumento di 400% den immigrashon, cu Hulandes Europeonan ta haña derecho di vota den eleccion y referendum local despues di 90 dia di yegada – E desplazashon di e populacion nativo Boneriano, cu a baha di mas o menos 80% den 2010 pa menos cu 30% awe – Perdida di tera, acceso economico, identidad cultural y bos politico, pasobra ley Hulandes ta domina y para riba gobernacion local.
Un proceso iguala cu eliminacion di nos identidad etnico y cultural, disfrasa como modernisacion.
Mientrastanto mundo ta scucha bo palabra fuerte contra recolonisashon, Boneiro ta biba e resultado ya mas cu un decada —no como speculacion, sino como realidad di tur dia.
Na 2015, pueblo di Boneiro cu gran mayoria den un referendum democratico a rechasa e status impone. Pero e mensahe cla y firme aki di autodeterminacion a wordo ignora. Nos boluntad democratico a wordo pone un banda. Na luga di trata nos como partner den Reino, nos a wordo expulsa for di e structura di Statuut, y keda sin proteccion of reconocimento legal of politico.
Cu shock y cu desilusion nos a wordo saca for di “Statuut” cu no tabata solamente decision di Hulanda, sino cu cooperacion, acuerdo, o silencio di nos partnernan Caribeño: Sint Maarten, Corsou, y Aruba. Mientras nan ta sigui funciona como pais autonomo bou di e Statuut, Boneiro a wordo saca afo di Statuut, y suheta na total dominacion unilateral di Hulanda. Silencio ta complicidad?
Prome Minister Mercelina, nos mester trece un otro punto na tension cu hopi hende den Caribe a observa cu preocupacion: Sr Mercelina su rol na october aña pasa como presidente di sesion na Nacionnan Uni durante e cumbre “Pacto di Futuro.” Nos, cu status consultativo di Nacionnan Uni di ECOSOC, a presencia personalmente con Sr Mercelina a wordo huza pa proyecta un imagen di inclusion Caribeño y harmonia den Reino —pero mientrastanto sr Mercelina tabata presidi e sesion, Boneiro y su pueblo tabata wordo sistematicamente elimina — un pueblo desplaza, su boluntad y decision democratico nenga, esakinan dor di politica cu ta refleha ideologia di Baudet den practica, sin mester declara abiertamente.
Esaki ta crea confusion y hasta un legitimacion falso den wowo di Miembronan di Nacionnan Uni, expertonan y comunidad internacional. Ora un Prome Minister Caribeño ta aparece pa duna impresion di un imagen di harmonia den Reino, mientrastanto nan islanan ruman ta wordo recolonisa y depopula, e resultado ta un interpretacion incorecto di e realidad y cu ta mina nos lucha.
Nos ta urgi sr Mercelina pa papia tambe pa e hendenan cu ta sufri caba bou di e mesun politica cu awor Baudet ta risca bisa na bos halto. Reconoce e crisis di derecho humano na Boneiro, y huza sr Mercelina su posesion pa bisa e berdad completo —pa tur pueblo Caribeño den Reino.
Sinceramente, cu respet y speransa, como un Boneriano nativo cu a sobrevivi tres intento di asesinato y a wordo cera ilegalmente, mi ta haci un yamada na Sint Maarten, Corsou y Aruba pa uni cu nos den nomber di husticia.