“Confiansa ta e balor di mas importante den politica.” Cu e conviccion aki, Eduard Pieters a
splica dicon fraccion di PPA no por a sostene e Ley di Presupuesto 2026. No pasobra e
numbernan no ta corecto, sino pasobra e manera con gobierno a trata Parlamento. Ora un
gobierno no ta contesta e preguntanan legitimo di un parlamentario, transparencia ta muri y
confiansa ta sigui e mesun destino.
Un Presupuesto cu riba papel ta sano
Pieters no a sconde di reconoce e hecho: “Criticamente lesa, e presupuesto ta cumpli cu e ley di
LAFT.” Aruba tin surplus atrobe, e norma di 1% ta respeta, e sector colectivo ta saludabel y e
schuld quota a baha. “Nos ta riba e bon caminda di maneho financiero,” el a afirma.
Precisamente p’esey, fraccion di PPA tabata cla, den prome instante, pa duna sosten na e
presupuesto.
E momento cu arogancia a interveni
Pero algo a cambia na caminda. Gobierno a bin cu cambio repentino, un Nota di Cambio, pa
ignora loke a wordo trata dialuna. Un cambio “manera un djaca den anochi,” cu un meta cla:
hala e LIM un banda y ignora e amienda historico, cu ta pidi igualdad den Reino Hulandes. “Bo
ta coy e LIM, cu Parlamento a vota pro y bo ta pone esaki un banda pa haci loke bo kier,”
Pieters a critica duramente.
Burla di Parlamento
Segun Pieters, esaki no ta solamente un diferencia di opinion politico; esaki ta un burla directo
di Parlamento. “Bo ta busca un manera tecnico-huridico pa hala Parlamento un banda,” el a
bisa. E mensahe ta peligroso: e organo mas halto di pais, e bos di pueblo, ta minimalisa ora no
ta cumbini. Incluso a laga nan mesun colega Mike de Meza cay, un acto cu Pieters a yama “un
señal claro di falta di respet interno, institucional y constitucional”
Transparencia no ta opcional
“Ta cu placa di pueblo nos ta bezig,” Pieters a recorda. Como parlamentario, su deber ta pa
salvaguardia bienestar general y maneho financiero responsabel di e placa di belasting. Pero sin
contesta, sin aclareacion y sin profundisacion, sosten ta bira imposibel. Transparencia no ta un
opcion politico; e ta un obligacion democratico.
E decision di PPA pa no sostene e Presupuesto 2026 no ta un acto di oposicion sin mas. E ta un
stand pa principio. “Ora gobierno ta burla Parlamento y ta mustra arogancia pa haci loke nan
kier,” Pieters a conclui, “democracia ta perdi!.” Aruba no mester menos presupuesto; Aruba
mester mas respet pa Parlamento, pa pueblo y pa e reglanan cu nos mes a pone.
Comunicado di Parlamentario Eduard Pieters (PPA):