Di akuerdo ku e registrashonnan ku a tuma lugá den luna di novèmber último, Minister di Hustisia a disidí, ku lo bolbe organisá un vuelo mas di repatriashon pa Venezuela den luna di desèmber 2020. Tin vários Venezolano na e momentunan aki ku debí na diferente faktor ta deseá di regresá nan pais. Aparte di esaki, tin personanan prosedente di Venezuela ku na e momentu aki ta detené en espera di regreso pa nan pais despues di a trata di drenta Kòrsou di forma indokumentá of ku despues di a drenta di forma legal no a hasi e petishonnan nesesario pa un estadia legal
Aktualmente, ainda no tin vuelo komersial entre Kòrsou i Venezuela ku por fasilitá Venezolanonan regreso pa nan pais.
En bista di esaki, Minister di Hustisia ta den kombersashon ku Kònsùl di Venezuela, pa logra yega na e posibilidat di un vuelo humanitario pa dia 16 februari próksimo.
Por lo pronto pasashinan lo ta na benta te ku 8 di februari prόksimo 18:00 di atardi na Curacao Handling Agent na Pietermaai Parking Mall na un preis di Naf 390,–. Esaki ta inklui ‘airpot tax’. Pa e vuelo aki lo tin un kantidat di lugá disponibel.
Un pcr-test positivo di 48 ora promé ku e buelo ku ta demostrá ku e persona konserní a tèst negativo pa Covid -19 ta eksigí.
Mas informashon ta optenibel via e link: .
Ta bon pa remarká, ku personanan Venezolano ku pa un òf otro motibu no tin un estadia legal na e momentu aki, i no a risibí anteriormente un desishon di ekspulshon, lo no risibí un desishon ministerial di ekspulshon (verwijderingsbeschikking). Konsekuentemente nan lo no wòrdu prohibí pa regresá dentro di 3 aña.
Si tin residentenan di Kòrsou ku ainda ta pegá na Venezuela, nan tambe lo por hasi uso di e vuelo aki i laga kumpra nan ticket serka Curacao Handling Agent. Den kuadro di desaroyonan pa ku Covid-19 nan lo mester tene kuenta ku e reglanan vigente pa entrada disponibel riba www.gobiernu.cw i https://govcw.ibis-management.com/?