Featured Bonaire Internacional

American Airlines lo oumentá buelo di Miami pa Boneiru


Tourism Corporation Bonaire ta sigurá buelonan adishonal semanal i tambe buelonan diario durante temporada di wenter

Despues di e anunsio ku Delta lo oumentá su kantidat di buelo for di Atlanta pa Boneiru pa e temporada drùk di wenter, awor American Airlines a anunsiá buelo diario for di Miami durante e periodo drùk di wenter, tambe buelo adishonal riba djaluna. E notisia aki ta bin komo resultado di esfuersonan di rekuperashon kontinuo di Tourism Corporation Bonaire (TCB) pa hasi e akseso pa bishitantenan por yega nos isla mas fasil, kombiná ku e demanda ku American Airlines ta risibiendo riba su buelonan direkto aktual for di Miami pa Boneiru.

Kuminsando 8 di novèmber, American Airlines lo añadí un di 3 buelo na su skema kual aktualmente ta konsistí di buelo riba djarason i djasabra. E buelo èkstra lo ta riba djaluna. Adishonalmente, lo pone un avion mas grandi riba djasabra kual lo bira un avion 737, ku lo trese èkstra kapasidat di stul, kaminda lo tin 44 stul èkstra pa pasaheronan. Pa finalisá, American Airlines lo ofresé buelo diario entre 16 di desèmber 2021 pa 3 di yanüari 2022, dor ku ta kalkulando ku e temporada aki lo bai bira unu hopi drùk pa biaheronan.

Prome Delta i awor American Airlines. Nos ta sumamente kontentu ku e demanda haltu ku nos isla ta risibiendo di e aerolíneanan grandi aki. E buelo adishonal aki ta mustra ku TCB ta kontinuá ku su esfuersonan di rekuperashon pa ofresé biaheronan aun mas opshon i buelo direkto pa nos isla,” Miles Mercera, direktor di TCB a bisa. “Komo parti di nos plan di rekuperashon di turismo, nos lo kontinuá ku esfuersonan i ta antisipá mas desaroyo, i nos ta spera mas notisia positivo. Nos ta spera di sigui mira oumento den turismo i tambe nos ekonomia lokal, mientras nos ta sigui riba e kaminda pa rekuperashon.”

Ademas Hennyson Thielman diputado di turismo a bisa, “Nos ta kontentu ku e oumento di buelo di tantu Delta i awor AA. Esaki ta e direkshon di e “Tourism Recovery Plan” i un resultado direkto di tur e esfuersonan ku nos a bin ta hasi pa rekuperá e merkado merikano. E periodo benidero ta mustra di bai ta unu drùk, kaminda komersiante nan den e sektor di turismo por bai spera moveshonnan ekonómiko positivo atrobe.”

American Airlines su buelo di djarason i djasabra ta sali for di Miami 10:45 i ta yega Boneiru 13:22, dunando bishitantenan sufisiente tempu pa eksplorá nos isla. E buelo bèk ta sali Boneiru 15:20, i ta yega Miami 18:36. E buelo nobo di djaluna lo tin mesun orario.

Related posts

Trahadornan di pisina Olimpico ta rabia cu ainda nan no a haya nan bashipremie

EA News Author

Segun informashon di Tourism Corporation Bonaire (TCB)

EA News Author

Kolegio Ehekutivo di Boneiru ta yuda habitantenan buska trabou temporal

EA News Author

1 comment

American Airlines lo oumentá buelo di Miami pa Boneiru - Notisia 365 July 24, 2021 at 11:30 pm

[…] Source link […]

Reply

Leave a Comment