ORANJESTAD / ARUBA , 3 di januari 2026
Prome Minister Mike Eman den conferencia di prensa ta indica cu Gobierno di Reino Hulandes a haci un yamada urgente na tur persona cu tin nacionalidad Hulandes cu ta presente na Venezuela pa registra na e servicio di informacion di Ministerio di Asuntonan Exterior, pa por garantisa cualkier asistencia necesario.
Prome Minister di Aruba, Mike Eman, a trata e tema durante un conferencia di prensa, unda el a duna mas informacion riba e contactonan cu tin cu diferente departamentonan cu ta sigui di cerca e desaroyo di e situacion na Venezuela.
Segun e informacion duna, despues cu forsa militarnan di Estados Unidos a drenta Venezuela y a captura presidente Venezolano Nicolas Maduro y su casa, Prome Minister Mike Eman y prome minister Hulandes Dick Schoof a tin un reunion di emergencia. Rey Willem-Alexander di Hulanda tambe tin su preocupacion riba e desaroyonan reciente.
Na mes momento, Prome Minister Eman a emiti un comunicado oficial indicando cu Reino Hulandes ta preocupa pa e siguridad di su ciudadano nan cu ta na Venezuela na e momentonan actual.
Gobierno ta conseha pa tur persona cu tin nacionalidad Hulandes inclui esnan cu ta biba na Aruba, Curaçao, Bonaire y Hulanda cu ta presente na Venezuela, pa registra na e Servicio di Informacion di Ministerio di Asuntonan Exterior via e website:
informatieservice.nederlandwereldwijd.nl
E registracion aki ta importante pa por facilita contacto rapido y asistencia consular si e situacion lo rekeri esaki.